Kahinam pag-abot sa tag-ulan

Miabot na usab ang gikabalak-an sa probinsiya-- ang hulaw. Siguradong apektado ang ilang pananom ug kahayupan. Busa kadaghanan midangop sa siyudad aron masalbar ang ilang kalisod.

Si Clifford nakahuna-huna nga ibaligya ang pipila niya ka kahayopan aron mapalit ang tanan nilang gikinahanglan sa pamilya. Nag-drive usab siya og habal-habal, iyawat na lang nga adunay magasto matag adlaw.

Apan tungod lagi sa hilabihang kainit maadlaw, moresulta usab kini og hilabihang kaigang magabii. Mao nga sa pantawan na lang siya magkatulgan magabii, diin mabatyagan ang diyutay'ng kahayahay.

Usa kadto ka gabii buot unta siyang modulog sa iyang asawa apan mireklamo. "Clifford wala usa ta karon kay igang kaayo paghuwat lang inig abot sa tag-ulan kay magdulog unya ta," pasalig sa asawa. Tungod niini matag human sa ilang panihapon, magkalingaw na lang siya og tagay sa tuba nga iyang gitangyaw sa tindahan ni Yoly, igo mahurot ang tuba moligdas siya sa pantawan dayon katulog.

Usa ka gabii niana, maayo ang pagkatulog ni Clifford kalit siyang nakamata. Gibati niya ang kabugnaw sa huros sa hangin. Natugaw usab siya sa sipa nga dalugdog ug kilat nga miuliot sa iyang dalunggan. Mitimbakuwas siya og bangon. Iyang gianinaw ang kalangitan, wala may kabituonan nga iyang nakita kaganina nisamot ang kangiob sa kagabhion. Nakatuaw siya sa iyang kaugalingon "natapos na ang hulaw nga miabot na ang tag-ulan."

Unya mibundak ang makusog kaayong ulan, misamot ang gibati niyang katugnaw ug kahinam. Unya misulod siya sa ilang lawak ni Marian. Diha sa iyang hunahuna ang dakong pasalamat nga matapos na gyud ang hulaw ug miabot na ang tag-ulan, aron makadulog na usab siya sa pinanggang asawa nga dugay na niyang gikahimanan. (Kataposan)