Pasar-pasar

Alas otso sa buntag. Nangmaneho na si Rudy sa iyang Isuzu Crosswind nga puti. Padung na siya sa iyang accounting firm sa Subangdaku, Mandaue. Nibagting iyang selpon nga nabutang.

Nipadaplin ug niurong siya duol sa eskina padung sa School of Fisheries sa Carmen. "Let us pray for our friend, Fred. Na-ICU siya kay giatake's kasingkasing" teks gikan ni Alex ig-agaw sa iyang kapikas nga si Mira. Nangurog ang kanuoran ni Rudy. Suod sab niyang higala si Fred. Tulo ka bulan ang nakalabay, niadtong Mayo 24, reunion sa mga kaliwat og Ortizano. Alas 10:00 sa buntag ang misa sa St. Augustine Parish. Ang salusalo inig ka  udto, adto sa Carmen Gym. Gitarista si Fred sa choir sa simbahan. Si Alex miyembro sa choir ug mogunit sab og tulonggon. Si Mira kay Ortizano ang inahan, nitambong sa misa. Kuyog gyud si Rudy kay siya may drayber sa kapikas. Dihang naghuwat pa sila sa pari, nakahisgut si Fred wa pa siya'y pamahaw kay gikan siya'g bilar unya nilahos na lang sa simbahan. Nahingawa si Rudy alang sa higala. "Ayaw gyud anang pagutom ug pasarpasar. Kay maglungag na'g daghang sakit sa lawas!" ni Rudy. Nigawas sa simbahan. Niadto sa parkingan. Nagkuha siya'g upat ka putos crackers sa sakyanan. Kay tigbawon man siya'g cracker aron di magutman sa biyahe.

Humag paniudto sa gym, gipakanta si Rudy sa mga ig-agaw ni Mira. "Masuko man gani ko'g di pakantahon" niya pa. "When  You Tell Me That You Love Me" iyang gikanta. "Ipahinungod ko ning kantaha sa tanang mga Ortizano nga nagkapundok karon tungod sa gugma sa Diyos, sa usag-usa ug gugma sa kinabuhi," ni Rudy pagdayong kanta.

"Yes, I will pray for  him. Hain mang ospitala siya karon?" bawos teks ni Rudy. Pagbawos ni Alex, nipasirit si Rudy og padagan sa sakyanan. Moduaw dayon siya ni Fred sa ospital. "Nababaan ba kaha nako ang iyang pagpagutom?" tuaw niya. (Kataposan)