Depekto sa tawo

Hain man diay tigtukaran si Willy Jim? ni Atty. Rudy Gabucan. Nangutana siya's iyang umagad nga kaatbang niya'g kaon sa lamesa sulod sa panimalay ni Edna, iyaan ni Jimmy. Imbitado ang abogado'g panihapon kay nagsaulog og birthday si Edna.

Si Willy libat og mata, hilumon kaayo lugos motingog kun may ka-estorya. Tingali asawa ray tinggan apan wa sila'y anak. Kay gawas sa depekto sa mata may depekto sab si Willy sa himan sa pagsanay.

"Main stay na siya sa Green Meadow Restobar, membro siya sa live band diha motukar siya bisa'g unsang tulonggon," ni Jimmy. Nakapangutana si Rudy kay hilig sab siya'g musika kamao siya mogunit og sista. Motukar sab siya's piyano, mokanta sab siya.

Bisan amiga na ni Rudy si Brenda kay nalabanan og kaso wa gyud ni Brenda gi-introduce iyang bana sa abogado. Tingali, gika-ulaw niya iyang bana o kaha di gyud mosugot si Willy nga ipaila sa abogado.

Si Brenda enkargado ni Edna sa iyang dakong sari-sari sa merkado busa kun dunay mga salusalo himuon si Edna, naa kanunay si Brenda ug siyempre iyang bana.

"Di man ta ko magtan-aw sa depekto sa lawas sa tawo makighigala ra man ko may mga amigo kong kimpang nga mga abogado, may libat sab. May barkada ko kaniadto nga kimpang sa estudyante pa ko. May higala sab kong libat nga stenographer kusog kaayo momakinilya, kusog sab mosuwat sa mga simbolo sa stenographer. May maid sab ko nga bungi," ni Rudy. "Tungod lagi sa iyang depekto pa abi niya'g ubos ang tinan-awan sa tanang tawo niya," ni Jimmy. Di gyud hinuon nato mabasol siya kun mao nay naabot sa iyang hunahuna ni Rudy.

"Di gyud na siya mouna'g tagad og tawo lisod man mo magkatinan-away kun gusto ka makig-diyam niya kinahanglang ikaw gyud ang mohagad niya," ni Jimmy. "Husto ako nang buhaton inig human natog kaon," ni Rudy.  "Pero ayaw gyud paghisgot sa iyang mata," ni Jimmy. "Natural dili na imposible mabuhat apan grabe kalisod buhaton ang paghisgot sa depekto sa imong higala," ni Rudy. (Kataposan)