I miss you, son - Gula 143

"Ambot lang Dios lang ang nasayud," matud pa ni Mylene. Pagka-Diosnon ni lola halos kada adlaw tua sa simbahan daghang simbahan ang gitabangan. Daghang simbahan nga siya ang benefactor pero ang iyang pagka Diosnon wala niya puy-i dili ko ka imagine nga mobayad si lola aron lang mapatay niya ang tawo nga dili niya gusto si Diane sad naliwat ni lola maldita," matud pa ni Kyle. "May tawo gyud nga ingon ana anak tingali sa huna-huna sa imong apohan ang pagtabang niya sa simbahan maoy iyang paagi nga mahugasan niya ang iyang mga sala sa iyang mga nabuhat," matud pa ni Mylene.

"Mura'g dili husto ang maong paagi ma," matud pa ni Kyle kalit nga may nabati silang sakyanan nga mihunong, daling gilili ni Kyle kun kinsay naabot. Maoy nakita niini ang amahan nga mikanaug gikan sa sakyanan daling mibalik si Kyle sa inahan ug nananghid nga mouna kini sa awto. Tua na sab sa iyang sakyanan ang mga maleta ni Mylene dihang mogawas na si Kyle, gikasugat niya ang iyang amahan sa may pultahan. Miduko lang si Kyle mipadaplin aron kahatagan og agianan ang iyang amahan aron makasulod sa hingpit sa balay. Apan wala muirog si Ferdie gitan-aw lang ni Kyle ang mga tiil sa amahan kun kanus-a kini molihok aron molakaw palayo sa iyang nahimutangan. Apan wala gyud mopahawa si Ferdie. Hinay nga giisa ni Kyle ang ulo aron motan-aw sa amahan apan nagkasugat ang ilang panan-aw. Miduko pagbalik si Kyle, apan migunit sa iyang suwang ang amahan aron ipaatubang kaniya. Nakita ni Kyle nga mipahiyom kaniya si Ferdie sa nakita sa lalaki wala siya makasabot sa iyang gibati, usa si Ferdie sa gibasol ni Kyle sa kagubot sa iyang kinabuhi sa gugma. Apan ang pahiyom sa amahan ingon og mipapas sa iyang kayugot kanhi sa iyang daddy.

"I miss you son," matud pa ni Ferdie nga kapin sa semana nga wala makita ang anak wala motingog si Kyle. Mitutok lang kini sa iyang daddy. Midugang sa pag-ingon si Ferdie, hatagan pa ba ko nimo sa katungod sa pagsangpit kanimo anak Kyle?” matud pa ni Ferdie nga nakapatandog sa balatian sa ulitawo samtang si Mylene usab natandog nga nakabati sa pulong sa bana ngadto sa ilang anak.

"Bisag magkinaunsa ang kalibutan dili malilong nga imo kong anak," hinay nga pagkasulti ni Kyle.

"Mingaw na kaayo si Daddy nimo," matud pa ni Ferdie nga mipahiyom apan may milugmaw nga luha sa mata niini mura'g gikumot ang kasing-kasing sa ulitawo nga nakabati sa pulong sa amahan. Mituhop ngadto sa kinauyokang bahin sa iyang kasing-kasing nga maoy naingnan nga wala makapugong ang ulitawo miagas usab ang mga luha niini. Kalit nga gibati ni Kyle ang susamang gibati sa iyang daddy kaniya ang kamingaw niya sa iyang amahan. Wala kapugngi ang kaugalingon migakos sa iyang amahan"Daddy, I miss you too," ni Kyle pa nga mibakho nga naggakos sa iyang daddy. "Subra ang akong kamingaw nimo nak. Bisan tua sa trabaho si daddy pero ikaw ang akong gihunahuna bisan busy si daddy sa trabaho pero gigahinan tika'g panahon sa paghunahuna. Ang kapin sa semana nga wa tika makita mura'g pila ka dekada nga nahimuwag ka nako. Mawala na ang tanang napundar nako dili lang unta mong akong pamilya ang mahanaw sa akong kinabuhi kay kamo ang tinuod kong bahandi Kyle, si Diane ug si mama mo. Kamo ang labaw'ng importante para nako," matud pa ni Ferdie nga mihilak dungan sa mibakhong si Kyle tungod sa nakita ni Mylene miduol kini kanila "ling sorry," ni Ferdie pa ngadto sa asawa. Mipahiyom lang si Mylene nga mihapuhap sa abaga sa bana."Pasayloa ko dad nga para ninyo nagmagahi ko sa akong ulo nagtuman ko sa akong gusto," matud pa ni Kyle.

"Nagtuman ka lang sa kabubut-on sa imong kasing-kasing anak ang akong huna-huna mosupak sa imong kagustohan pero sa kinahiladman sa akong kasing-kasing dako kong uyon supak man ko sa inyong pagtuo kini tungod ra usab sa inyong apohan kay dili ko gusto nga isalikway ka nila," matud pa ni Ferdie. (Sumpayan)