Taytayan sa Gugma - Gula 1

Ang gugma dili magpili og lugar o tawo nga higugmaon. Dili magpili kun unsay kinatawhan (gender). Mupitik kini nga dili lang damhon. May gugma sa anak ngadto sa ginikanan, gugma sa ginikanan ngadto sa mga anak, gugma sa managsuon ug gugma nga gilatid nang daan sa Labaw nga Makagagahom nga maoy mamahimong kapikas sa kinabuhi ug kamatayon lang ang makauwang. Apan aduna usa'y gugma nga mupitik ngadto sa samang kinatawhan, kining matanga sa gugma sa uban gisaway. Niyam-iran sa katilingban. Daw kagaw sila sa panan-aw niadtong katilingban nga nagpakalimpiyo nga dili gani maglantaw kun unsa kahugaw sa ilang palibot diin mismo sila mas labaw pa kasalawayon kay sa tawo nga ilang gihukmang hugaw. Apan sala ba sa usa ka linalang kun mupitik ang iyang kasing-kasing ngadto sa susama niya’g kamatang? Dili ba managsama ang tanan nga minugna sa iyang magbubuhat? Sala ba nga mahigugma? Kun ang tubag sa maong pangutana nga dili, nan nganong pagayam-iran man sila? Tawo usab sila nga sama kanato gimugna sa labaw nga makagagahom, nga sa ato pa, may katungod sila nga mahigugma kay sama kanato, Dios ang ilang magbubuhat. Unsa ba gyud diay ang matuod nga kahulogan sa gugma?

Ang gugma daghan og sirkumstansiya, mga pagsulay sa kinabuhi, daw unos nga mukuso-kuso, daw tubig sa kasapaan nga kusog ang bul-og nga ingon og dili ka makahimo sa paglabang ngadto sa laing tampi. Anaa ra sa usa ka linalang kun unsaon niya pagdala ug pagsulbad sa mga paghasmag sa mga pagsulay sa iyang kinabuhi. Usahay ang tawo, dili makaabot sa padulngan ilabi na’g adunay nakauwang nga halapad nga sapa diin kusog ang bul-og sa tubig. Sa dapit nga paga-adtoan, atua naghulat ang gipangita nga tinuod nga gugma. Busa, sama sa kinabuhi sa tawo, dili nato makab-ot ang butang o makaplagan ang dugay nang gipangandoy sa kinabuhi nga mao ang matuod nga gugma, busa magkinahanglan niining gitawag og TAYTAYAN SA GUGMA.

* * *

“Ayyyy!!.” pagka-igking ni Dorina. Nagpanghikap sa iyang dughan samtang milantaw sa kalangitan, naka-ingon, “kakusog ba adtong kilata oy. Mu-uwan man siguro ron,” ni Dorina pa. Tuod man, wala kaabti’g usa ka minuto human mipaka ang makusog nga liti ug mibundak gikan sa kalangitan ang ulan. Giusban pa og laing makusog nga liti, dugdog nga ingon og tay-ogon niini ang yuta. Nagpanguros si Dorina samtang daling gihipos diha sa gawas ang mga hinayhay nga iyang gilabhan.

“Ahhhhhh,” pagtuaw sa usa ka batang babaye nga nag-edad pa lamang og 5 anyos, si Bernalyn. Daling nahilingi sa sulod si Dorina diin nabasa na ang tibuok lawas sa uwan.

“Bernalyn anak!” ni Dorina pa. Daling misulod sa barong-barong nga ilang gipuy-an. Baynte otso anyos si Dorina. Usa ka tuig pa lang si Bernalyn, namatay kay gipusil sa wa mailhing tawo ang iyang bana ni Dorina nga si Onyot. Naila ang namatay niyang bana nga usa ka tigpayuhot og ginadiling drugas. Gidudahan nga sinugo sa usa ka druglord ang nagpatay sa bana ni Dorina.

Tungod kay walay naabot nga grado ang babaye, pagpanglabada lang ang nahimong kadangpan aron mabuhi niya ang duha niya ka mga anak nga sila si Bernalyn ug Bernabie. Tungod sa kahapo ug way maayong kaon kay ipalabi lang ngadto sa duha ka mga anak, mihugo og maayo si Dorina. Kanunay nga mag-ubo, gani, gidudahan nga may sakit kini sa baga.

“Maaaaa!!!” Tingog ni Bernalyn nga nagkurog sa kahadlok nga giduol sa mapinanggaon nga inahan.

“Anak, nia na si mama,” daling gikab-ot ang gision na nilang tuwalya nga gisab-it sa lansang nga gitaroy sa gamayng haligi sa ilang balay ug nanrapo sa basa niining lawas ug migakos sa anak.

“Nahadlok ko ma!” Ni Bernalyn nga way puas ang paghilak ug padayon nga nagkurog. Paghikap ni Dorina sa anak, makapaso ang kainit, misamot ang pagpangurog sa bata ug nagkabuang si Dorina kay miisa ang kalimutaw sa anak.

“Ginoo ko, Bernalyn!!!” tuaw sa inahan nga misapopo sa anak. (Sumpayan)