Taliabot nga bisita - Gula 137

"Unsa? Please ayaw gubta ang party ugmang adlawa hangyo ko kana kanimo Mylene, daghang imbitaron si Mama ug Papa nga mga inila sa katilingban mga negosyante ug mga investors please ayaw na'g buhata," hangyo pa ni Ferdie.

"Abi ko ba'g salo-salo sa pamilya," ni Mylene pa.

"No dili lang kay salo-salo sa pamilya lang kini usa ka party kay adunay i-launch ang pamilya nga laing negosyo didto sa Hong Kong. Daghang investors ang manunga mga prominenting mga tawo. Adunay mga politiko ug mga suod nga higala sa pamilya nga mga pari please ayaw pakaulawi ang pamilya pinaagi sa imong pagbutyag sa tinuod Mylene. Please ako na kini naghangyo nimo o mouyon na ko nga imo nang isulti nila ang imong pagka-ikaw kaniadto apan ayaw una ugma please," todo hangyo ni Ferdie sa asawa. "Mas maayo nga daghang tawo ugma mas maayo aron silang tanan masayod nga ang bugtong umagad sa usa sa labing adunahang negosyante sa Pilipinas may maut nga kagahapon. Aron dili na maglisud ang imong pamilya pagpasabot sa mga mangutana unya," matud pa ni Mylene. "No!!! Ayaw na'g buhata kun buhaton mo kana mapugos ko nga akoy una nga mosalikway nimo. Kalimtan ko nga nahimo ko ikaw'ng asawa," matud pa ni Ferdie mipahiyom lang si Mylene ngadto kang Ferdie dayon mitalikod nangagho na lang si Ferdie.

Didto sa mansiyon mipabulhot sa iyang sakyanan si Kyle palayo sa maong harianong panimalay nabati pa kini sa senyora. Milingo-lingo sa hunahuna andam siyang mobuhat sa unsay angay'ng buhaton. Bisan pa'g bayran niya'g usa ka milyon ang kinabuhi ni Pia buhaton niya kini lamang mawala sa kinabuhi ni Kyle si Pia kalit nga mibagting ang cellphone sa senyora gitan-aw ang narehistro sa cellphone nga mao ang nanawag.

"Hello," tubag ni Senyora Conchita sa nanawag sa iyang cellphone.

"Magkita ta sa akong apartment karon dayon," si Kyle sa pikas linya nga nanawag sa iyang inahan.

"Ngano man? Unsa ba kana ka importante anak?" Si Mylene nga nahibulong kay ang tono sa sinultihan ni Kyle ingon og may importante silang panagsultihan.

"Sa apartment ko na lang ka sultihan agion ko usab si Pia sa ilaha," ni Kyle pa sa pikas linya. Daling nag-ilis si Mylene aron moadto sa apartment ni Kyle sa Cebu City dihang mogawas na unta si Mylene sa kuwarto nga nakailis na ug andam nang mulakaw diha sa atubangan sa pultahan si Ferdie nakurat si Mylene.

"Asa ka? Nag-ilis ka man?" pangutana ni Ferdie sa asawa.

"Molakaw may adtuon lang ko," tubag pa ni Mylene.

"Dili ka mulakaw," pagmando sa bana.

"Importante ang akong adtuon Ferdie," matud pa ni Mylene.

"Mas importanteng dili ka molakaw," ni Ferdie pa.

Unsa? Ug unsay naka importante nga magpundo ko dinhi sa balay?" matud pa ni Mylene.

"Moanhi si mama sa balay," pagpahibawo ni Ferdie nga nagpadulong na ang ugangan.

"May lakton ko Ferdie, importante kaayo," ni Mylene dayong talikod sa bana apan nasumbalik siya  sa iyang agi kay gibira siya ni Fedie pabalik.

"Ferdie unsa ba? Ayaw ko'g langaya," matud pa ni Mylene nga milugnot.

"May importanteng pakigsultihan nato si mama," matud pa ni Ferdie..

"Pakigsultihan? Mahitungod sa unsa?" Pagpangunot sa agtang ni Mylene.

"Ang mahitungod sa imong plano sa pagsulti kanila sa tinuod nimong pagka-ikaw kaniadto. Nasayod na si mama sa imong trabaho kaniadto," matud pa ni Ferdie nga wala sab mahimutang.

"Ha? Diin siya masayod? Kinsay nagsulti niya?" pagkahibulong ni Mylene. (Sumpayan)