Nadala sa taktika

Nagbakasyon lang si Lando sa lugar sa pinuy-anan sa maanyag nga dalaga nga si Mira. Dayo si Lando ug wala kahibawo ang dalaga sa kahimtang sa ulitawo.

Sa pagka tinuod usa lang ka konduktor sa multicab ang ulitawo sa ilang lugar. Naibog siya ni Mira, mao na karon ang iyang gihambin nga problema. Ug sa tanto niyang pinsar, may taktika si Lando nga nahunahunaan pinaagi sa pagpatahi og sapot sa doktor aron ipatuo sa tisay nga dalaga. Unya nagpakuyog siya sa suod niyang higala nga si Tikboy.

"Bay Lando, masaril kaha ning imong taktika?" ni Tikboy. "Mahadlok man sab ko ani kay maapil sa bulilyaso!"

"Ayaw'g kahadlok, Tikboy, ako'y bahala!" pasalig ni Lando.

Pagka sunod adlaw nahuman na gyud ang iyang gipatahi nga sapot sa doktor. Ug namisita dayon si Lando nianang gabii. Gisugot siya sa dalaga ug nakapanglingo-lingo nga dalang kulba. Ug wala hibaw-i, sa ilang relasyon niburos ang dalaga.

Apan may nabantayan si Mira nga walay kagamitan sa doktor si Lando. Mao nga nagduda na ang dalaga. Ug iya dayong gipanid-an ang ulitawo. Unya nananghid si Lando nga mobalik sa iyang pinuy-anan. Sa hilom nga pamaagi gisundan sa dalaga ang kalihokan sa ulitawo.

Apan wala gyud diay aso nga makumkom tungod kay nakita sa duha ka mga mata ni Mira nga usa diay ka konduktor si Lando. Maayo gyud pagka sulod sa laang niini. Sa walay paglangan iya kining gisudyaan.

"Lando, nganong imo kung giilad...?" ni Mira. "Nagpatuo ka nga ikaw usa ka doktor! Pero ang tinuod, konduktor man diay ka!"

"Tungod sa gugma, Mira, gihimo nako ang tanan. Pareho ra gud anang mosuroy ka sa siyudad unya naa kay makita nga imong gikaibgan, siyempre mangandoy kang ma imo!" ni Lando.

"Sus, unsaon na man lang ning akong tiyan namabdos ra ba ni!" ni Mira." Nadala ko sa imong taktika Lando!" (Kataposan)