Pag-asoy - Gula 29

Naglingo-lingo si Mylene nakita niya kun unsa diay ka responsabling anak ug maguwang si Pia may rason kun nganong misulod siya sa maong trabaho aron mahatag niya ang panginahanglan sa iyang pamilya mokabat sa usa ka oras kapin ang pagpaabot ni Mylene nga matapos sa iyang mga gimbuhaton. Human makailis giagda na ni  Pia  si Mylene nga manglakaw na misakay sila og taxi, nangita og usa ka restaurant nga medyo mingaw aron magkasultihanay sila'g maayo human maka order, gisugdan nila ang pagkaon.

"Nakita mo na ang among kalisud?" ni Pia nga milad-ok sa gisuyop niyang softdrink. Nanghupaw si Mylene.

"Kadiyot lang Pia," mibarog si Mylene miduol sa usa ka waiter ingon og adunay gisulti sa waiter human sa tuyo niini sa waiter mibalik ngadto kang Pia. "Karon unsay imong gustong masayran?" matud pa ni Pia.

"Gusto kong masayod kun nganong...kun nganong....." ni Mylene pa nga wala matiwas ang buot isulti kay gisapawan dayon ni Pia.

"Kun nganong gibuwagan ko ang inyong anak?" ni Pia ug nanghupaw dayon mipadayon sa pag-ingon "simple lang tungod kay dili ko angay sa inyong anak ma'am. Taas ra kaayo siya aron modaginot nako sa sama nakong kalidad sa tawo nasayod ko kun unsay inyong pangandoy alang kang Kyle nahunahuna na ko nga basin og mamahimong babag lang ko sa inyong plano kang Kyle. Nasayod ko way ginikanan nga wa mangandoy og kaayohan alang sa ilang anak. Nasayod ko kun unsa mo kadato kun unsa mo ka kuwartahan, apan nasayod sab ko nga kamong klaseha sa ginikanan dili mo spoiled og anak gusto ninyo nga makabarog og ila ang inyong mga anak dili ba? Wala ko masayop?" ni Pia pa mitando lang si Mylene.

"Nahigugma ka ba sa akong anak?" pangutana ni Mylene.

"Way babaye nga dili makagusto kang Kyle ma'am guwapo ang inyong anak labaw sa tanan buotan, gisugot ko siya dili tungod kay nahigugma ko kun dili nakagusto lang ug wala malambigit niini ang gugma. Usa pa unang gabii nga nagkita mi sa club nga akong gitrabahoan, unang gabii diha ibabaw sa kama, nanguyab nako si Kyle, gisugot ko siya agi'g bayad usab sa dakong kantidad nga iyang gibayad nako niadtong tungora. Wala ko mahigugma sa inyong anak apan sa ngadto-ngadto nakat-unan ko siya sa paghigugma dili tungod sa kuwarta kun dili tungod sa iyang kabuotan sa iyang pagkasensiro diri nako," taas nga pamahayag ni Pia.

"So nahigugma ka sa akong anak?" ni Mylene pa.

"Oo, nahigugma ko kang Kyle dili pagpakaaron-ingnon kun dili tiunay nga gugma," matud pa ni Pia "apan nganong gibuwagan mo man siya?"laing pangutana ni Mylene kang Pia.

"Gitubag ko na kanang maong pangutana tungod kay nahunahuna nako nga dili ko angay sa inyong anak gisultihan ko na si Kyle sa hinungdan dihang mihagad siya'g kasal nako wala na ko mahimutang…nahuna-huna nako nga seryoso na si Kyle sa iyang tinguha. Sa akong pagpakigrelasyon niya kontento na ko nga magkita mi kuhaon ko niya sa club apan dihang mi-propose siya nako'g kasal didto daghan nang mga pangutana sa akong hunahuna. Usa na niini nga kun magpakasal mi, dili ba nga mantsa lang ko sa inyong bansagon? Dili ba nga kaulawan lang ko sa apilyedong Suarez? Way aso nga makumkom kun itago ko ang akong tinuod nga pagka ako. Magpabiling ako si Pia ang babayeng salawayon, ang babaye nga naa mabuhi sa lapukong dapit," ni Pia pa nga aduna nay nagpahiping luha sa iyang mga mata.

"Nakahinumdom ko didto sa inyong dapit dihang nangutana ko kun nakaila ka ba ni Pia, miingon ka nga naa ba ko aron mohagad og dakong salapi aron palay-an mo si Kyle. Ngano Pia may tawo ba nga miduol nimo sa wala pa ko makigkita nimo? May tawo nga mi-offer kanimo'g bayad aron buwagan ug palay-an si Kyle? Kinsa siya Pia?" pangutana ni Mylene kang Pia nga nakapahilom sa dalaga ug miduko. (Sumpayan)