Ug mihilak ang dalagang engkanto

May dakong punoan sa baliti duol sa balay nilang Mr. Magno nga usa ka doktor. Unya, usa ka hapon may usa ka dalaga ang misulod sa klinika ni Doktor Magno. Ug mihangyo siya nga iyang patambalan ang iyang igsuong lalaki nga nasakit ug tua karon sa ilang balay.

“Hain man diay ang inyong balay, Inday?” nagpakisayod si Doktor Magno.

“Silingan ra man ta, Doktor,” tubag sa dalaga. Guwapa kining maong dalaga ug pinadunghay ang buhok. Taluytoy ang iyang ilong, puti ang pamanit ug nindot kaayo’g lawas ug ingon sa gibati’g kaibog ang doktor sa dalaga. “Unsa to, silingan ta, Inday. Tabi, kinsa man diay ka, I mean kinsa man ang imong pangalan?’ 

“Maria Eliza, dok,” mubong tubag sa guwapang dalaga.

“Tuod, sa didto na sila sa dakong balay sa dalaga,“A, kining, Maria Eliza, naglibog ko, kun nganong kalit lang dunay mansion diha sa atbang sa among balay,” mitutok si Doktor Magno sa dalaga.

“Dok, dili man gud mi parehas ninyo, mga engkanto mi, ug kining mansion nga nia   karon mao ang dakong baliti diha sa inyong atbang,” pahayag sa dalagang engkantada.

“Ha, mao ba, a, kining hain man ang pasyente nga akong tambalan?” nagpakisayod si Doktor Magno.

“Wala, Doktor. Sulti ko lang kadto. Abi nimo, Doktor Magno, dugay na kong naibog nimo. Parehas ka’g hitsura sa namatay kong hinigugma. Pero ayaw kahadlok kay makapauli ka sa inyoha. Pero kinahanglang matulog ka uban kanako,” ni Maria Eliza nga miduol sa doktor.

Ug nakatulog gyod si Doktor Magno sa kiliran ni Maria Eliza engkantada. Aw, ulitawo man pud kini si Doktor Magno. Ug matag Biyernes sa gabii hayag kaayo ang dakong punoan sa baliti atbang sa balay nilang doktor. Ug ang amahan ug inahan ni Doktor Magno mahibulong na lang nga ila mang makita ang iyang anak nga mopaingon sa dakong punoan sa baliti ug unya kalit lang mahanaw. Ug tagsa ka buwan una kini mahibalik. (Katapusan)