Paghanduraw sa kagahapon

“Buhi-i kanang buak nga bildo.Ayaw pagpakahungog, Kyle, utang buot. Ayaw gub-a ang imong kaugmaon tungod lang kang Pia.” Matud pa sa inahan nga dali kaayong nakapugong sa buot untang buhaton nga paglaslas ni Kyle sa iyang pulso pinaagi sa buak nga bildo. Nakuha kini ni Mylene.

Nagloy na ang mata ni Kyle, nagpasabot nga hubog na kini apan ang kahubog wala makahanaw sa gibating kasakit sa iyang dughan. Mihilak na usab si Kyle, mibakho apan ingon og wala nay luha nga motulo gikan sa iyang mga mata. Ingon og nahubsan na kini sa luha. “Mahal ko si Pia. Wa koy labot kun pila na ka laki ang mipatong niya. Wa koy labot kun naa siya mabuhi sa matang sa trabaho. Ang importante alang nako nga mahal ko siya... ma, mahal ko si Pia. Mahal gyud kaayo. Unsaon man nako aron mobalik siya nako? Ma, dili ko gusto nga mawala nako si Pia.

Bati ba gud ko’g nawong aron buwagan ko ni Pia? Bati-a gyud oy! Ila ra man kong pasakitan. Dili man sila ganahan nga malipay ko. Ma, wala diay koy katungod nga malipay? Nganong ila mang gihikaw nako ang makalipay nako? Si Pia? Nganong nagpadala man siya sa ilang hulhog? Gibayran siya aron palay-an ko, dili ba ma?

Dili ba.. mahal nako si Pia. Pia balik na ko, please, please, please...” ni Kyle pa nga inanay nga mihinay  ang tingog. “Shh,.shh.. husto na anak. Husto na.” Ni Mylene pa nga misapupo sa ulo sa anak samtang naggakos kaniya. Gihagkan ni Mylene ang agtang sa anak nga nakatulog sa iyang mga bukton. Nagsige na lang og halok si Mylene kang Kyle, gihapuhap ang ulo ug nagkanayon, “anak, unsaon ko man sa pagtabang nimo? Unsa may mahimo ko anak aron makuhaan ang gibating kasakit sa imong dughan? Mahal ko kaayo ikaw anak.

Kun mahimo pa lang nga ako na lang unta ang mopas-an sa kasakit nga imong gibati karon? Kun mahimo pa lang nga mapoypoy ko ang gibating kabug-at sa imong gibati karon, dugay ko ra kining gibuhat. Sakit sa sama nakong inahan ang makita ang anak nga mipatulo og maayo sa iyang mga luha tungod kay gisakitan. Anak ko, Kyle pagkamakalulooy mo. Unsa may akong matabang nimo anak. Unsa man?” Ni Mylene pa nga namulong, kalma apan ang luha midagayday sa iyang aping. Dili tiaw sa usa ka inahan nga magsud-ong sa anak nga mihilak tungod kay gisakitan sa iyang dughan.

Kun mahimo pa lang unta nga masawo ni Mylene ang mga kasakitan sa anak, iya na kining gibuhat. Dihang nasiguro na ni Mylene nga nakatulog ang anak, gitawag niya ang ilang driver nga maoy nag-drive niya. Gialsa ni Kanor si Kyle paingon sa kwarto niini. Human mapahimutang ang ulitawo sa kama, migawas ang driver sa kwarto. Gisud-ong ni Mylene si Kyle. Nahinumdom siya sa bata pa si Kyle. Si Kyle nga kanhing bibo nga pagkabata, si Kyle nga gipakasama nila ni Ferdie nga makapawala sa kakapoy sa trabaho.

Si Kyle nga hingatawa nga pagkabata, karon usa na ka hingkod nga ulitawo. Ang kaniadtong hingatawa napulihan sa pagkapalahilak. Kini gumikan ra usab sa gugma. Tungod kay nagkadugo ang karsones lakip na ang gisul-ob nga t-shirt ni Kyle. Gihuboan kini ni Mylene. Gihukas sa inahan ang t-shirt sa anak. Samtang naghukas, mipahiyom ang inahan samtang midagayday ang mga luha sa aping gikan sa mga mata niini. Pahiyom tungod kay nahinumdom siya sa bata pa si Kyle nga kun magkahugaw, siya mismo ang mohubo sa t-shirt niini aron ilisan. Siya mismo ang mangunay pag-atiman sa mga anak sa bata pa kini. Ang kanhing bata nga hukasan sa t-shirt, karon nasubli pag-usab apan usa na ka hingkod. Managsamang gimahal ug pinangga ni Mylene ang duha ka mga anak nga sila si Kyle ug Diane. Dihang nahubo na ang t-shirt, gisunod ni Mylene ang karsones. Nahinumdom na usab si Mylene sa bata pa si Kyle nga siya gyud mismo ang mangunay pag-ilis og diaper ni Kyle. Mapahiyumon apan luhaan ang mga mata sa inahan nga sa makausa pa, miatiman na usab sa anak.

Mikuha og labakara si Mylene sa comfort room, nag-init og tubig, nagkuha og planggana aron katrapohan si Kyle. Samtang nagtrapo sa ulitawo, laing paghandum na usab sa nangagi ang nahinumduman ni Mylene. Sa bata pa si Kyle, kun magkabulingit sa chocolates ang lawas, siya gyud gihapon mismo ang mokuha’g basa nga labakara aron kuhaon ang buling sa nawong sa anak, lakip na ang nagkabulingit niining lawas. Gihandum ang mga nanglabay nga panahon, apan kalit nga nakugang si Mylene gikan sa iyang paghanduraw sa mga nanglabay nga panahon kay may kalit nga miabli sa pultahan. (Sumpayan)