Madyik

Nagwarawara si Noy Toting sa iyang tuong kamot samtang nagpenal, naggunit siya'g gamay nga librita nga iyang ipadawat kang bisan kinsa sa iyang mga anak ug pag-umangkon nga nag-apong duol sa iyang katre.

Ang librita sama kadak-a sa pitsas sa madyong ug tunga sa pulgada ang gibag-on. Otsenta na ang  edad ni Toting ug dugay nang biyudo. Ang librita maoy naghatag niya'g abilidad sa black magic. Na-stroke siya tungod sa hayblad ug lugos na katingog ning sayong kahapunon. Nagtinga na siya nga giapongan sa tulo niya ka anak nga sila si Manolo, Amante ug Dominador diha sab si Avito, pag-umangkon sa tiguwang.

"Dad-a na lang na Tay imong librita way gustong modawat ana," ni Manolo nga subo ang panagway.

Wa nakapadato ni Noy Toting ang iyang abilidad, igo rang kalingawan sa tibuok barangay Baquilid para panuba o inom ra iyang abilidad. Apan wa gyu'y laing kamao sa iyang madyik molamoy siya'g usa ka bolang hilo nga numero 80, pasundan niya og dagom, unya buslotan niya'g dagum iyang tiyan. Mogawas ang dagum nga may tanod na nga hilo. Birahon niya gikan sa iyang tiyan ang hilo taas kaayo kay balig usa ka bola ug dugay mapupos.

"Tiyo, molakaw una ko kay magkuha ko'g modawat sa imong librita" ni Avito. "Asa man ka gaw?" ni Manolo. "Masayod ra ka inig balik nako" ni Avito. Gisundan sa tulo ka magsuon og tan-aw ilang ig-agaw nga nanaug sa ilang panimalay. Unya gisud-ong nila ilang amahan tagsa na lang moginhawa.

Pagbalik ni Avito, nagkugos na og unggoy nga mura'g usa ka tuig nga bata ang gidak-on. Tanod kaayo ang maong unggoy dili mamaak. "Diin man na nimong unggoy, gaw?" ni Manolo. "Binuhi ni sa akong ugangan, akong gihuwaman kadiyot. Maoy akong padawaton sa librita," ni Avito.

Gipaduol ni Avito sa tiguwang ang unggoy, nidawat dayon sa gitunol sa tiguwang nga wa nay kalibutan sa iyang gibuhat. Danag na ug nabugtoan dayon sa gininhawa si Noy Toting. Panid-an lang unya nila ang unggoy kun makat-on ba og madyik. (Kataposan)