Milagrong gasa ni Senyor Santo Niño

“Senyor Santo Niño, salamat sa milagrong gasa nga imong gihatag kanako atol sa imong kapistahan! Pit Senyor! Viva Senyor Santo Niño...!” nagluhod nga nagyamyam sa iyang baba si Minda sa sulod sa gamay’ng kapilya sa kilid sa ilang balay ning buntaga.  Pista ni Senyor Santo Niño na! Ang kadalanan misibaw na sa naglagubong mga tambol sa dram nga nagsunod sa matag contingents sa nagsinulog sa kadalanan.

Pinaagi sa ultrasound, nasuta sa mga doktor nga gikunsolta ni Minda nga aduna na siya’y 8 centimeters nga cyst sa matres nga gikinahanglan sa dinaliang operasyon aron dili modako  ang iyang tiyan ug masalbar pa ang iyang kinabuhi. Apan hugot ang hukom ni Minda nga di gayud siya magpa-opera. Plain housekeeper lang siya ug wa siya’y kuwarta nga ikasarang pagbayad sa ipahigayong operasyon. Igo-igo ra gayud ang sweldo sa iyang bana nga si Al, isip regular nga kawani sa city hall. Maikog usab si Minda sa pagsangpit og pinansyal nga panabang sa naminyo na nilang tulo ka mga anak nga babaye.

“Way imposible sa Ginoo, Al! Atong debuto si Senyor Santo Niño nga tuyo natong gipahimoan og gamay’ng kapilya sa kilid sa atong balay, mao nga siya ang kanunay kong giampoan ug gisangpit, nga ihatag niya kanako ang kaayohan sa akong cyst sa matres...!” mao kini ang lig-ong hukom ni Minda. Matag Martes ug Biyernes, motambong gayud siya sa  Misa sa Basilica Minore ug mohalok sa imahen ni Senyor Santo Niño.

“Dako ug hugot ang akong pagtuo sa imong pagkamilagruso, Senyor Santo Niño! Ayoha tawon ko sa gihambin kong balatian nga di na kinahanglan ang usa ka operasyon...!” kinasingkasing gayud ang way puas nga pag-ampo ni Minda ngadto kang Senyor Santo Niño.

Paglabay sa Oktubre, Nobiyembre ug Disyembre sa miaging tuig, nagpa-ultrasound na sab si Minda. Sa kahibulong sa mga doktor, hingpit nga napapas ang 8 sentimetros nga cyst sa matres ni Minda ––ang milagrong gasa ni Senyor Santo Niño kaniya!

Mao nga atol sa pista ni Senyor Santo Niño ning buntaga,  kinasingkasing nagluhod pa gihapon si Minda sa atubangan sa imahen ni Senyor Santo Niño sa sulod sa gamay nilang kapilya sa kilid sa balay. Ug nasiklapan niya nga nag-abot-abot na ang  ilang  mga bisita nga gi-abi-abi sa iyang bana. Unang higayon nga nagkumbira sila si Minda ug Al atol sa pista sa Senyor Santo Niño! (Katapusan)