Ang lanog nga siyagit Mekoy mangtas

Matag abot sa alas dose ang takna sa gabii maoy mabati sa taga dinhi sa sityo Linugaw ang lanog nga siyagit ni Mekoy nga mura'g gisakitan.

Ug tuod, dali ra kaayong mikaylap ang balita nga si Mekoy kuno gipatakdan ug puwerte na gani kunong daota. Si Beatriz nga uyab niini maoy misugilon bahin sa kahimtang ni Mekoy nga ang nakaingon ning iyang kahimtang mao ang ulo sa tabugok nga linuto ni Sinto bungol, ang gidudahan nga usa ka mangtas nga ungo. Apan mao lagi dili motuo ang mga silingan kay wala man nila makita si Sinto nga nangabat.

"Sus, ungo diya'ng dako kana si Sinto," ni Beatriz pa ngadtong Olyot, ang ulitawong mahilig sa sugal ug daghan kaayong uyab dinhi sa sityo Linugaw.

"Mura'g lisod tuhoan nang imong gisulti, dah, Triz," ni Olyot pa sa hinigugma ni Mekoy.

"Triz, kadiyot lang," agpas ni Olyot.

"Unsa man!?" mura'g naglagot si Beatriz.

"Daot na man kaayo si Mekoy, kita na lang. Total, nakagusto man ko nimo. Macho pa, unya si Mekoy bukog na la'g panit."

Pagka-ugma sa gabii, nagubot ang sityo Linugaw kay napalgan si Olyot nga wala nay kinabuhi. Naputol ang kinatawo niini ug nagalhab ang iyang tiyan ug wala nay mga tinai ug tungol.

"Ayaayyy, yaaayyy! kasakitttt! Huwaaaa!! Beatrizzzz! Daliii naaa!" gikan sa hanayhay sa bungtod diin mahimutang ang balay nilang Mekoy mao kini mabati sa mga silingan. Tungod niini, si Martin, nga bagis wala gyud kaagwanta iya gyung giadto si Mekoy ning mga orasa sa gabii, gadala siya'g pistola ug hait nga plamingko.

"Hoyy, Mekoyyy! Unsa man kada alas dose na gyud ning isyagit!? Makatugaw ka na sa mga silingan! Hunonga na ning binuang nimo, ha, kay kun dili, bala unya ang mohagik  sa imong ulo!" Ug mipabuto si Martin sa iyang pistola. Pagka-ugma, mao na pay nakia sa mga silingan si Martin nga wala nay kinatawo ug patay na nga nagbuy-od sa kinasang-ang dalan paingon sa baybayon.  (Kataposan)