Diamante

Mao pa gani ang pagbanag-banag nagtingkagol na ang balay sa among silingan nga si Jeffrey ug Clare, nga mamalitay og scrap materials.

Gilibut ni Jeffrey ang mga kabalayan nga sudlonon, alingisig kaayo ang paghot sa mga  iro. Apan wa panumbalinga ni Jeffrey, ang naa sa iyang huna-huna nga makakuwarta siya nga unta naa siya'y ikapalit og bugas karong adlawa.

Sa pag-uli ni Jeffrey samtang nagtindak siya sa iyang trisikad nga  puno sa mga scrap may tiguwang siyang naagian nga nagsungkod.

"Manoy, asa ka man nga puwerte mang inita aron?" ni Jeffrey nga nihunong sa tiguwang. "Ako unta ning ipatimbang dong!" sa tiguwang nga nagbagiid sa sako nga iyang gisudlan sa maong puthaw.

"Manoy, asa man diay ang inyoha? Kinsa may ngalan nimo? Sakay na lang manoy. Ako na lay palit ana para di ka mahago," ni Jeffrey dayong agak sa tiguwang. "Ako si Berlito, Dong, taga Sitio Ubos," sa tiguwang pa.

Human nabayran ni Jeffrey ang tiguwang gidala niya sa karenderia ni Malie, ug gihukaran ni Emma, kay nagluto pa man si Flora, ang amiga ni Jeffrey. Sa na bayran na ni Jeffrey ang ilang gika-on gihatud niya ang tiguwang sa ila. Natingala si Jeffrey nga ang ilang giagian usa ka suba, pero ang isig kilid may naglinya'ng mga bakhaw ug pagatpat.

Ug sa unahan may payag nga gamay. Unya gitudlo ni Manoy Berlito ang iyang puloy-anan. Gipalibot ni Jeffrey ang iyang mata sa payag nga gikatayan sa dakong bagon.

"Sige, Manoy, dili nako magdugay kay magpatimbang pa ko sa ilang Max!" ni Jeffrey. "Ayo-ayo, Ondo, pag-amping sa pagpauli!" ni Manoy Berlito pa. Pag-abot niya sa ilang Max nagtinimbangay dayon sila, apan wa madawat ang  puthaw sa tiguwang kay ipaputol-putol ni Max. Tungod kay dako ra man gud mora'g bayhon sa gasol.

Nipauli si Jeffrey aron adto niya putol-putulon sa ilang balay, nagkuha dayon siya'g gabas sa puthaw aron gabson. Dako niya'ng katingala sa maong butang kay sa napikas na may nangatagak nga mora'g bolitas nigilak-gilak kini sa iyang pagpunit mga diamante diay.

Kalit silang naadunahan, nakapalit sila'g junk shop ug mga sakyanan.  (Kataposan)