Booking

Gula 30

"Unsa may buot nimong ipasabot bayot?" Pagpangunot sa agtang ni Lina.

"Nahibawo na gyud ka nga usa ko sa nangandoy nga makatilaw anang Carlo." Matud pa sa bayot nga mibalikos ang usa ka bukton sa hawak sa dalaga.

"Unya?" bugtong pulong ni Lina.

"I-booking ko niya day. Shodi hinangol day. Sharing is virtue baya day. Shodi lang pakolor." Matud pa sa bayot nga ang buot ipasabot sa shodi pakolor kay dili magpahalata o magpaklaro sa laing tawo sa gusto niini.

"Day, naa say gina-ingon nga if there's a way there's a will," matud pa ni Lina. Ug mibuhak-hak ang bayot.

"Pak pak !.. lingwa estofada arangkada... tuara!! Akatap ang peg day?" Matud pa sa bayot nga gibali ang pulong nga pataka ngadto sa akatap. "Unsa bay pataka?" Nangunot na sab ang agtang ni Lina.

"Kun dili sure sa isulti, ayaw na lang litoka," matud pa sa bayot nga pinatabon sa baba pagkatawa.

"Unsa may sayop adto gud? Sakto man gud to," matud pa ni Lina.

"If there's a will there's a way," pagkoreher pa ni Eser kang Lina.

"Dah parehas ra na oy nagbaylo lang ang WILL ug ang WAY, at least naa ang duha," matud pa ni Lina nga mikuha sa kamot sa bayot nga gibalikos sa hawak niini ug nagkanayon, "pahawa diha bayot bi komas kaayo ka dah," matud ni Lina nga ang buot ipasabot sa komas samok. Sa gay lingo master usab si Lina dili malibak sa mga bayot sa mga paagi sa pagsulti niini.

"Basta day, TY-on nato ang imong utang naku nga P1,200 basta mabooking ko nimo ni Carlo," paghangyo pa ni Eser kang Lina.

"Paningkamot og imo bayot pangita sa imong kaugalingong paagi nga makuha nimo si Carlo, kala-in pod paminawon mura’g mahulog nga bugawan naku si Carlo," matud pa sa dalaga.

"Kalami rag dialogue ah mura mag madrehunon. Unya Day wala ka laini nga human sa amahan didto kana sad sa anak? Hain may mas lain ana?" Pulong pa ni Eser. Inay tubagon ni Lina ang bayot mitalikod kini ug mikanaug.

Samtang si Carlo, nga sa ubos nagpaabot medyo gilaay na pagpinaabot kang Lina nga nakigsulti sa bayot nga si Eser. Hapit na gani maupos ang usa ka stick nga sigarilyo. Mag alas 10 na sa gabii nanira na ang tindahan nga gipalitan niyag duha ka stick nga sigarilyo. Dihang padulong nang moupos dagkotan na unta ni Carlo ang ikaduhang stick sa sigarelyo apan"Carlo..." si Lina nga nagpa-ingon niya, "pasensiya na ha nadugay ko sa taas  unsaon man sad gud ning bayot tabian kaayo.

"Unsa man diay inyong gipanagsultihan?" pangutana ni Carlo. "Dah, naningil naa man gud koy utang niya dali na ihatud na lang ko sa atanganan og jeep," matud pa ni Lina.

"Ayaw oy  kuyogan ta na lang ka sa inyo," pagbulontaryo pa ni Carlo.

"Pangitaon ka ni papa nimo," matud pa ni Lina.

"Di ko ganahang mopauli sa amo Lin," matud pa ni Carlo.

"Dili ka ganahang mopauli sa inyo dong Carlo, sus andam ug tagana kaayo kong mopadayon ngadto sa akong parlor aron ang kaliwat ni Adan kahatagan sa iyang kahigdaan," pulong pa sa pagbulontaryo ni Eser nga nagpaingon sa ilang nahimutangan.

"Ayaw lang Ser oy. Maikog ta nimo adto lang ko sa ilang Lina," pag-ayad pa ni Carlo sa tanyag sa bayot. "Shodi sugop kapamilya bayot," matud pa ni Lina nga ang buot ipasabot dili mamugos sa tawong dili ganahan.

"Okay, fine. Makakarating sa paroroonan," matud pa ni Eser nga may planong buhaton. "Unsay buot nimong ipasabot bayot?" Pangutana ni Lina nga midiyong ang mga mata.

"Adunay mobuto ugma ug magpista silang tanan," matud pa ni Eser dayong talikod sa duruha may buot nga buhaton ang bayot kun unsa man mao kini ang atngan ni Lina ug Carlo. (Sumpayan)