Paabota si Mr. Right

Hi Medyo Maldito, mo share ko's akong love experience bisan og 17 pa ko. Itago lang ko's pangalan nga Keken. Bisa'g 17 pa akong edad, nahigugma na gyod ko ug nasakitan. Two years nami sa akong uyab. Iya ko'ng gilikayan ato for a week unya pag 2nd anniversary namo, nagka-istorya mi og balik. Abi nako og ma happy ko ato kay nagka estorya mi.

Nahugno gyod akong kalibutan sa iyang giingon. Nakabuntis siya. Sakit kaayo. Love kaayo nako siya, Medyo Maldito. Pero niingon siya nako nga, "Ken, daghan ko’g problema sabta sa mi." Unsaon ni nako pag- move on nga sa akong mga naagian, siya ra man akong pirmi makit-an. Daghan na gyod mi og memories, unya mura na sad mi og managtiayon . Unsaon man ni nako, Medyo Maldito?

* * *

Nakapait aning mga relationship, bisan pa og unsa mo kadugay nag-uban, magbuwag gyod mo kung di gyud mo meant to be. Magbuwag ra mo kung ang imong uyab way klaro ug di makontento sa usa. Maayo ra's sinugdanan, mura’g fountain. Sa sugod ra ang sparks, unya paghuman, mawala na, mapaw’ng ra. Kung love gyud ka niya, di na siya mangita og laing babaye. Maong pasalamat na lang pud ka nga mintras sayo pa, nakita na nimo kung unsa gyod siya. Makasugod na ka og move on. Huna-hunaa nga 17 pa ka ug makakita ra ka sa  imong Mr. Right sa saktong panahon. Focus sa imong pag- eskwela aron di na ka magsige og huna-huna niya. Maglisod ka'g move on kung mag sige ka'g agi atong dalan nga naa siya. Kung wa na gyud kay laing maagian, head up na lang, fake a smile, ug move on.

Mawala ra nang feelings nimo para niya. Tuig gani, magbag-o,  feelings pa kaha nimo. Lisod gyod mag move on labaw na nga nag duha mo ka tuig nag -uban. Lisod pero di imposible. Maka move on ra ka niya, Keken. Kana inyong mga memories, angay na lang na'ng bisitahon. Di na ka angay mupuyo diha. Makakita ra ka'g lain nga para gyod nimo. Kahibaw ko nga sa tanang party nga naapilan nimo atong Disyembre, naa gyod kay laing party nga gusto. Ang ma-'PARTY' pa ka sa iyang kinabuhi. Pero unsaon man, di na man pwede. Naa na man siya'y laing gusto nga PARTY. Iyang third PARTY. Naa pa gyod sila'y baby.

*  * *

Ganahan ka magpatambag? Ipada na sa: [email protected]