Mutya nga gikan sa engkanto

Malinawon ang balangay sa Santa Ines apan nahimo kini karong samok ug wala’y kalinaw. Matag adlaw duna gyu’y mamatay kay napusilan o di ba nadunggaban.

Ug kun dili pinusilay  dinunggabay  dunay mahitabong lugos. Kay kausa niana, duna may hipalgang patay'ng lawas sa usa ka dalaga nga matud pa gilugos una patya. Tungod man gud kini sa pag-abot ni Brako dinhi sa balangay, ang ex-convict nga daghan nang nahimong krimen. Ug kay nagtukod man kini'g grupo, maong nahimong dugoon nga dapit ang balangay sa Santa Ines. Unya, dunay usa ka ulitawo nga hilomon ug  kini mao si Badok, ang anak ulitawo sa magtiayong Sulo-Ason. Guwapo kini siya ug buotan. Ug tua kini magtrabaho sa siyudad isip waiter sa usa ka restawran. Ug matag gabii, mopauli kini siya. Dili siya makaplete kay mosakay man lang siya sa trak de karga sa ilang silingan nga magbiyahian sa pantalan. Apan, demalas kay giatngan si Badok sa "Gang" ni Brako. Gikulata si Badok. Gisamaran ang iyang dughan ug aping. Ug nagkamang na lang kining mipauli sa ilaha.

"Ginoo ko, unsay nahitabo nimo, Dong Badok, nganong puwerte nimong daghang bun-og ug samad,  hu, h u, hu..." nakahilak ang inahan sa iyang nasaksihan kang Badok. Mitulo pud ang luha ni Sulo. Tungod sa paghilak og kusog ni Ason, may mituktok sa ilang pultahan. Giablihan ni Sulo, ug maoy mibantang sa iyang panan-aw ang usa ka gulangon apan guwapohong lalaki. Mipaila kini nga silingan nila.

"Silingan ra man ta," niini pa. "Nakabati man gud ko nga bun-og ug samaran ang inyong anak. Sige lang, ayaw lang mo kabalaka,  kay duna koy ihatag sa inyong anak. Ug kun duna na siya ining maong mutya, malinaw na unya kining inyong baryo..."

"Ngano man diay, sir, maunsa man diay si Badok kun naa na siya anang mutyaa?" nangutana si Sulo.

"Mahimo siyang bangis, kusgan, kublan ug abtik," hinay'ng tubag sa gulangong lalaki dungan sa paghatag sa mutya ngadtong Sulo. "Inig kaayo niya, ihatag ni niya, kay makatabang kaayo ni ninyo..."

Ug nanaog ang gulangong lalaki. Miuwang ang iro ug unya nahilom. Tuod, kalit lang nga gisulong ni Badok ang grupo nilang Brako ug nahitabo ang pinusilay ug dinunggabay. Walay armas si Badok apan daw kilat ang iyang lihok nga misalibay sa mga bagis nga kriminal. Namatay si Brako ug nabungkag ang ilang "Gang" ug wala damhang nalinaw ang balangay sa Santa Ines. Nahibalik ang kanhing kalinaw. Ug gikuha sa gulangong lalaki ang mutya ug siya nagpaila nga usa ka engkanto nga naa magpuyo sa dakong kahoy nga Balugo sa atbang.  (Kataposan)