Ang giandam nga noche buena

Hilabihang sadyaa sa tibuok siyudad sa nagsingabot na gayud ang tungang gabii aron sa pagsugat ug paghangop sa pag-abot sa Pasko. Sa ilang mansyong balay, namatikdan ni Alfie nga mas bongga karon ang giandam nga noche buena sa iyang daddy ug mommy.

Lalim bay lima ka litsong bultong baboy, 10 ka litsong pabo ug laing lima ka litsong nati nga baka nga giplastar na sa taas ug gibuyon nga mga tag-as nga lamesa sa lagwerta.

"Dad Leo, Mom Roda, mora'g espesyal ang giandam ninyong noche buena ning Paskoha! Bongga ang bangkite...!", matud ni Alfie ngadto sa negosyante niyang mga ginikanan nga usa sa labing adunahan dinhi sa siyudad sa Sugbo. Nanag-iya ang iyang daddy Leo ug mommy Roda og usa ka five-star hotel, usa ka dakong mall, duha ka dagkong pribadong banko ug lima ka dagkong tindahan sa hardware. Duha lamang silang mga anak nga pulos mga lalake. Si Alfie usa na ka lisensiyadong civil engineer. Ang iyang manghod nga si Pipo, wala na igdungog sa siyudad, human kini nakadala og lima ka milyon ka pesos sa panudlanan sa iyang mga ginikanan. Nagumon sa ginadiling droga ang iyang manghod!

"Oo, Alfie! Dinhi sa mansyon, maoy atong mga bisita karong gabhiona sa pagsaulog sa Pasko, ang tanang mga kabos nga silingan sa eskuwater, tanang mga makililimos sa siyudad ug tanang sinalikway sa katilingban nga nagkinahanglan og pag-amuma! Ug may lain pa gyud tang espesyal nga bisita ning Paskoha, nga maoy usa sa gitagan-an ko sa atong bonggang noche buena...!" matud sa daddy ni Alfie.

"Ug ania na siya, Alfie! Ang imong manghod nga si Pipo! Mibalik siya sa atong mansyon human sa lima ka tuig nga pagkawala ug misaad nga magbag-o na sa  kinabuhi...!" dason sa Mommy ni Alfie.

Nakurat si Alfie, dihang migula si Pipo sa usa sa lawak sa mansyon nga hilabihang niwanga sa pamayhon. Nagginaksanay sila si Alfie ug Pipo, lakip na sa iyang daddy ug mommy, nga mihangop sa matuod nga diwa sa Pasko niadtong gabhiona. (Kataposan)