Kasadya ning taknaa

Pasko na gayud! Sa tibuok baryo sa Kabadyangan, misulbong ang nagkadaiyang pabuto aron sa pagsugat sa Pasko. Misulbong ang kwitis sa kalangitan.

Misirit ug mingiyaw ang whistle bomb. Mora'g machine gun ang sagunson nga paka-paka sa gikutay nga pakite sa rebentador. Milugan-ob ang butobuto sa bawang ug trayanggul. Unya, milanog ang malipayong singgit ug suliyaw sa baryohanan nga mihangop sa pagsaulog sa Pasko. "Malipayong Pasko...! Malipayong Pasko...!"

Ug mibulhot ang mga stereo ug sound system sa kabalayan sa paskohanong awit nga "Kasadya Ning Taknaa"!

Pagkasadya ba gayud diay sa Pasko. Igo lang nga nakapanglingo si Ingko Eddie. Iyang gipasiklapan ang taknaan nga nagbitay sa bungbong sa iyang balay. Alas-12 na gayud diay sa tungang gabii. Kasaulogan na sa Pasko. Apan sa gihapon, lahi na ang pamatyag ni Ingko Eddie sa iyang pagsaulog sa Pasko ning gabhiona. Sa iyang pangedaron karon nga mitungtong na sa 80, tuyhag gihapon ang pamayhon ug linaktan, nga nagpuyong nag-inusara sa karaang balay sa baryo human sa daghang katuigan nang nakalabay sukad siya mabiyudo, daw wala na siya mobati og kasadya sa matag saulog sa Pasko. Alang kang Ingko Eddie, daw ordinaryo na lamang alang kaniya ang pag-abot sa Pasko. Anaa na kaniya ang agay-ay sa katigulangon, nga gipangunayan sa paggalam ug pag-amuma ni Nang Sarya, ang pag-umangkon niyang katabang gikan pa sa sinugdan.

Ug sa matag Pasko, duawon na lamang si Ingko Eddie dinhi sa iyang balay sa lima niya ka mga anak nga mga propesyonal, (duha ang babaye ug tulo ang lalake) nga pulos na mga minyo ug atua   manimuyo sa siyudad.

Unya, diha sa natad, atol sa kasaulogan sa Pasko, nasawod sa pandungog ni Ingko Eddie ang mga bata nga mananaygon kaniya, nga nagsing-al sa paskohanong awit nga "Kasadya Ning Taknaa". Giliwag ni Ingko Eddie ang iyang panan-aw sa mga batang mananaygon diha sa natad. Daw nakita usab niya ang iyang pamayhon sa iyang kagahapon nga kanhi usa usab siya ka batang mananaygon! (Kataposan)