Dro Arts

Ug nagkanayon pa si Marissa, “ Wala ka motagam nga gilabay ka’g eraser ni ma’am?” Matud pa ni Marissa nga padayong mibakyaw sa libro kay gustong ihapak kang Carlo.

“Ayaw oy Marissa.” Matud pa ni Carlo nga dali kaayong mibarog ug mipalayo’g dyutay kang Marissa kay nahadlok nga motugdon sa iyang ulo ang libro, dayong pagpaubos ni Marissa sa kamot nga naggunit sa bagang libro.

“Sakit-sakit sad baya tong pagkaigo sa akong nawong nga gilabay sa terror natong maestra.” Matud pa ni Carlo nga nagpanghapyod sa iyang aping ug mipadayon sa pag-ingon, “sorry na ha.”

“Sus, maglagot gyud ko nimo oy, nagparehas lang mo si Larry dah.” Matud pa ni Marissa. Si Larry nga iyang gihisgotan, mao ang iyang classmate nga nakadasmag niya nianang pagkabuntag. Mipadayon si Marisa pag-ingon,” sakit pa baya kaayo ning akong sampot tungod sa kadanghag ni Larry. Pun-an pa gyud miduol ka.”

“Naglagot ka ni Larry?” pangutana pa ni Carlo. Mingislo lang si Marissa ug dayong barog. Gibiyaan diha sa iyang nahimutangan si Carlo ug minghoy ang panagway kay wala pa gihapon siya hatagi’g maayong pagtagad ni Marissa.

Adunay gibuhat si Carlo nga wala mauyoni ni Marissa sa unang semana pa lang sa ilang klase. Pagbuhat sa ingon nga sa matag kakita ni Marissa kang Carlo, magsurok na ang iyang dugo.

Tungod lagi kay mestizo, gwapo, ug nahulog nga campus crush si Carlo, confident sad kaayo ni ug maoy naa sa hunahuna nga ang tanang babaye sa ilang eskwelahan, naibog niya. Unang adlaw sa klase, ug unang pagkakita niya kang Marissa, presko na kaayo kini nga mipakita’g mga lihok nga sa pagtuo adunay gusto kaniya ang babaye. Si Larry usab nga una niyang nasuod, maoy permi niyang sultihan sa iyang gustong buhaton kang Marissa. Sultihan nga iyang gi-imagine si Marissa nga iyang gihagkan ug si Marissa siguradong mopatol gyud kun kini iyang panguyaban. Si Larry sab nga way preno ang baba, misulti ngadto kang Marissa, ug didto, nagsugod na’g kapungot ang babaye kun makakita kini kang Carlo.

Aduna pay higayon nga nagsunod si Carlo kang Marissa nga paingong moadto sa library, gihikap ang sampot niini, ug wala makapugong ang babaye, gitamparos kini nga igo gyud makapawingig kang Carlo. Morag nakakita’g aninipot nga lain-lain og kolor ang lalaki.

Wala magtoong mabuhat kadto ni Marissa kay sa iya laging hunahuna may gusto ang babaye kaniya. Didto, nasayran ni Carlo ang mahitungod sa tanang gisulti niya kang Larry.

Tungod sa gibuhat nga pagbinastos ni Carlo sa babaye, naabot kini sa guidance office, gipatawag ang mga ginikanan ni Carlo. Kay wala’y inahan ug tua kini sa gawas sa nasud, ang iyang amahan mao untay moadto sa guidance aron atubangon ang pagtawag sa atensiyon niini. Igo lang nangayo og sorry si Arturo sa gibuhat sa anak. Pag-uli sa balay, gibukbok ang anak kay kuno nagpakaulaw. Mahadlok sab nga mosukol sa amahan si Carlo kay dako kini’g lawas, kanunay nga nag-gym. 

Miingon pa ang amahan nga kun mobuhat man sa ingon siguroon kuno nga nakagusto sab ang babaye dili kay magpataka na lang og kumot sa gustong kumoton. Mahinomduman pa ni Carlo ang giingon sa amahan nga maghuwat siya nga ang babaye maoy moduol kay kaliwat kuno sila ang dugokon og mga babaye. Pero lahi si Carlo kay mao may manguna ilabi na og nakagusto siya sa maong babaye, sama pananglit kang Marissa.

Samtang nag-inusara si Carlo sa may bench, nakahunahuna siya nga way dautan nga maibog siya kang Marissa ug magpantasya siya niini. Unya miduol kaniya si Vincent, ang usa sa iyang classmates nga mibugal-bugal kaniya sa classroom. Nangunot ang agtang sa lalaki ug nagpangumo. (sumpayan)