Lami ang tuba ni Miyoy ungo

Kutob sa makatilaw sa tuba ni Miyoy ingon sa magpangita gyud kay matud pa nindot kuno'g templada. Ug mao kini nga sila si Bertong, Kolas ug Demit nga mga manananggot usab dinhi sa balangay sa San Roque gibati'g kasuya ngadtong Miyoy.

Si Miyoy taudtaod nang nabiyudo. Tungod niini si Miyok nga suod nga higala ni Miyoy mitupotupo kang Ibyang nga dalagang guwang nga tua magpuyo sa sityo Mag-uwak. Apan si Miyoy igo lang mopahiyom sa higayon nga hisgotan ni Miyok ang dalagang guwang.

Unya gawas kang Ibyang may usa ka dalaga apan dili dalagang guwang ang naibog kang Miyoy. Si Cedes, anak ni Antonia-Dolfo, nga nagpanuigon pag-bayente singko anyos. Ug matag hapon moadto gyud kini siya sa payag ni Miyoy diin adto niini templahi sa tungog ang iyang tuba. Ug ang nakapait ra ba kay si Cedes moprangka gyud og estorya. Sama niaron nga mipahayag siya.

"Buotan kaayo ka, uy, Miyoy, mao nay gusto nakong pamanhon. Si Kardo, no, lain kaayo, kay kausa iya kong giatngan sa dalan. "Uy, lugoson unta kang Kardo, kun mao na," hinay ang tingog ni Miyoy. Pero, dihay kagot sa ngipon nga mura'g milagiti diha sa iyang bag-ang.

"Sige lang, kay sultihan nako si Kardo nga dili maayo ang iyang gibuhat labi na sa usa ka dalaga sama nimo."

Pagka-ugma, hipalgan ang patay'ng lawas ni Kardo nga nakunis-kunis ang tibuok kalawasan. Ug naligo kini sa tuba nga mura'g gituyo og bubo. Pagkagabii, grabeng kasipa sa tingog sa wakwak. Ug pagka-gabii, mianha si Cedes sa payag ni Miyoy, ug mipahiyom nga namulong nga paraygon kaayo, "Miyoy, sayod man ko nga ikaw ang nagbalbal ni Kardo. Ayaw lang gud paglimod kay kami kaliwat man sab og ungo...si nanay Tonia mangtas ug ingon man si tatay Dolfo. He, he, he, mag-ipon na lang ta dinhi sa imong payag, Miyoy. Total pulos man ta mga ungo, he, he, he, he.." Ug nahimong itom nga langgam si Cedes. (Kataposan)