Daman Sa Udtong Tutok - Gula 56
Sa sinultihan ni Jack, nabalaka ako nga tingalig lakip ako iyang patyon. Ako man gud maoy hinungdan kun nganong gibugalbugalan siya sa mga tawo sa among dapit. Mao nga sa higayon nga magpatungod si Jack sa among pinuy-anan, mokusog ang pagbutok-butok sa akong dughan sa kahadlok.
Nakaginhawa ko’g luag sa dihang may nangabot na nga mga polis gikan sa lungsod. May nakataho na diay sa mga tinugyanan sa balaud mahitungod sa paghuramentado ni Jack. Nakapasalamat ako sa Diyos.
“Buhii kanang imong hinagiban,” nagkanayon ang usa ka polis nga mimando kang Jack. ‘Ampo nga malinawon.”
Apan wala mopatuo si Jack sa kapolisan. Midangarang hinuon siya sa pagdasmag ngadto kanila. Nakasabot nga dili gyud mosurender si Jack, napugos ang kapolisan sa paggamit sa ilang mga armas.
Gipusil si Jack sa kapolisan. Girakrakan nila siya sa ilang mga armas. Natusaktusak si Jack sa daghang mga bala.
Mihagba siya sa yuta nga wala nay kinabuhi. Naglunang siya sa kaugalingon niyang dugo.
Ang dapit nga nahitaboan sa pagpusil sa mga polis kang Jack dili kaayo layo sa among balay. Gikan sa bentana nga akong gipakang-a og diyotay, milili ako ug nakita gayod nako ang nahitabo.
Mura’g misayaw si Jack sa kasakit dihang naigo siya sa mga bala.
“Jack...!!!” Singgit ko sa kinatas-ang tingog samtang mikanaog gikan sa balay ug mipaingon sa dapit diin siya nahagba nga wala nay kinabuhi.
Gisapupo nako ang iyang ulo. Nakahilak ko. Bisan tuod nga wala na akoy gugma alang kaniya apan mibati gihapon ako’g kaluoy kaniya. Gibati ko nga daw gisakitan ako sa iyang kamatayon, kaha tungod kay siya man ang amahan sa duha ko ka anak.
Akoy gibasol sa mga ginikanan ni Jack sa nahitabo sa ilang anak. Kun dili pa unta kuno tungod sa akong pagkakundatan, dili mahiagoman ni Jack ang sayong kamatayon.
Apan gipalapos ko na lang sa pikas kong dalunggan ang ilang pagtulisok kanako. Gilikayan nako ang mga ginikanan ni Jack.
Sa akong bahin, nakonsensiya ako sa kamatayon ni Jack. Giangkon ko nga nakasala ako sa among kaminyoon. -- Taposon
- Latest
