Sukli sa gibayad

Sa pagkasayod gayod ni Ingko Damian nga nagsabak si Pasing nga iyang anak ug ang tawo nga maoy nagbuong sa kadungganan niini mao ang anak sa iyang agawon, hilabihan niyang sukoa ug wala siya makapugong sa pagkastigo niini.

Alang kang Ingko Damian, usa ka dakong pakaulaw ug nakabuling kini sa iyang kadungganan bisan pa sa iyang katimawa. Ug tungod niini gihinginlan niya si Pasing ug gibaharan nga dili pasak-on pagbalik sa kabos niyang pinuy-anan.

"Ayaw gayod pagbalik, Pasing, kun dili ka luwason sa tawo nga maoy responsable sa imong gidangatan," ni Ingko Damian nga midiyong ang nawong.

Nanaog si Pasing nga nagsawilik sa iyang mga luha. May katarongan si tatay Damian niya tungod sa dakong sala nga iyang nahimo. Wa man god siya magdahom nga budhian siya ni Lando, ang anak sa ilang agalon nga maoy tag-iya niining asyenda nga ilang gisap-an. Igo ra diay kining nagpahimulos sa iyang kahuyang ug hangtod karon wala na magpakita kaniya. Misibat ang banyaga. Kadtong mga matam-is nga pasalig gipakaingon niya og mao na kadto ang langit apan impiyerno diay nga misunog sa iyang lawas ug kalag.

Tungod niini, nabug-os sa iyang hunahuna ang pagpanimalos. Puslan man nga naingon siya niini moambak siya sa impiyerno. Tuod man,miabot ang panahon nga iyang gipaabot. Bitbit ang mahait nga hinagiban way kukaluoy nga iyang gitampok ang bukobuko ni Lando nga wa makabantay kaniya. Ug ang ulitawo nakaangkon sa hinanali niyang kamatayon. Unya...

"Tay... nakabawos na ko," matud ni Pasing. "Nakabawos sa unsa?" midiyong ang nawong ni Ingko Damian.

"Gipatay ko si Lando. Ug adto na ko Tay, aron pagsilbi sa silot nga ipahamtang kanako sa balaod."

"Wa makatingog si Ingko Damian. Taudtaod siyang nahitutok nga way bisan usa na lang ka pulong nga milugwa sa iyang baba. Mao na lay iyang namatngonan nga nag-anam na kalayo sa iyang panan-aw si Pasing. Mitulo ang iyang mga luha. (Kataposan)