Daman Sa Udtong Tutok - Gula 46

Kinasal ka ba niadtong imong asawa, Orlan?" Wala tuyoa nga mao kini ang pangutana nga akong gikabungat.

"Oo," tubag ni Orlan. "Pero na-annulled na ang among kaminyoon. Gipaanul sa iyang ikaduhang bana nga sapian."

"Kun mao," nako pa. "Puyde ka diay nga maminyo pag-usab."

"Oo," niya pa. "Pero mura'g mitagam na ko sa kaminyoon. Kun magminyo man ko pag-usab, pilion ko ang babaye nga mosabot sa akong kahimtang. Kanang babaye nga makadawat sa akong pagka-ako."

Nahitutok ako kang Orlan.

Nagduko lang siya sa akong atubangan.

Sukad niadtong maong panagsulti namo ni Orlan, nagkasuod kami. Ambot ug ngano, apan namatikdan nako nga gaan kaayo ang akong kabubut-on ngadto ni Orlan. Mura ba'g may bahin sa akong pagkatawo nga nakadani kanako.

Hapit kada gabii sa dili pa kami mangatulog, magsultihanay kami si Orlan. Bisan tuod nga hilumon siya apan motubay man usab kun pakigsultihan.

"Anugona nimo, no," matud niya usa ka higayon niana sa among panagsulti.

"Nganong nakasulti ka man niana?" Gipangutana ko siya. -- Sumpayan pa