Dagtom

Sulod sa labong kakahuyan, naghupohupo si Rael. Giandam niya ang iyang tirador nga nag-ugom na ang panit sa lingin nga batong bala. Gisupak niya karon ang pasidaan sa iyang Tatay Nesto ug Nanay Sepa, nga dili gayud manirador sa mga langgam sa giamuma nilang kakahuyan sa ilang banika nga gipuy-an sa mga dagkong langgam sama sa manatad, punay, tukmo, alimukon ug antulihaw.

Tinguha sa iyang mga ginikanan nga musanay ang maong mga langgam.

Apan ning adlawa nga Sabado nga way klase ang grade six nga eskuylahang elementaryang publiko sa ilang baryo, nakahukom si Rael nga mosulay sa paglingawlingaw og panirador. Matud sa iyang klasmeyt nga si Samuel, lami kuno ang karne sa langgam tukmo! Motilaw siya sa sinugbang karne sa tukmo!

“Tog...!” milagubo ang dughan sa tukmo nga naigo sa tirador ni Rael. Misukarap kini pagtugpa sa unahan. Abtik nga gisundan dayon ni Rael ang nahagsa nga tukmo didto sa nagdagtom nga dakong punoan sa lawaan. Dagtom kaayo! Mora’g nagtabyo’g nga dakong telon! Nakuryuso si Rael sa nagdagtom! Giinat na usab niya ang iyang tirador nga nag-ugom na’g bala nga bato ang panit niini. Nahikalimot siya sa naigo niyang tukmo. Gitirador ni Rael ang nagtabyo’g nga dagtom nga maayong pagkaigo. Kalit nga may mialibwag nga daghang nanglupad! Mga putyokan!

“B-balay sa putyokan...!” nakasinggit si Rael nga midagan gawas sa labong kakahuyan. Apan gisundan siya sa namungot nga mga putyokan ug giikosan. Nagkadagmadagma si Rael nga mipauli sa iyang balay. Halos wa na siya mailhi sa iyang Tatay Nesto ug Nanay Sepa, kay mibutoy ang iyang nawong sa inikosan sa daghang putyokan.

“Giingnan bitaw tika nga bataa ka nga ayaw panirador og langgam sa atong kakahuyan, kay gibantayan sa dagtom nga mga putyokan...!” mahay sa Tatay ni Rael. “Mao nay resulta sa batang masupilon sa pahimangno sa mga ginikanan...!” dason sa nanay ni Rael.

Igo lang miagumod si Rael nga nanagunto sa kasakit sa mihubag niyang nawong nga giikosan sa mga dagtom nga putyokan! (Kataposan)