Ang ungo nga buta

Daan pa sa iyang pagkabata buta na si Lolita. Tingali, kun wala pa mamatay ang iyang ig-agaw nga doktor nga si Doktor Romeo gipa-operahan na ang iyang mga mata. Dugay na man gud nga pangandoy ni Romeo nga makakita na si Lolita.

Duha ra silang managsuon si Lolita. Si Conching, ang maguwang ug siya ang manghod. Karong bag-o may nahitabo kang Conching nga mura'g katingalahan kay dili na man siya mokaon. Gusto na lang kining maghinuktok kanunay. Gani, midaot na si Conching. Dunay tabitabi nga si Conching maoy gibinlan sa iyang nanay Karya nga labihang mangtasa.

'Mao na, si Conching ang gibinlan,' ni Magna pa ngadto sa iyang silingan nga si Kulasa.

"Dili tingali, uy, Magna. Dili man tingali ungo si Karya uy Magna. Wala man lagi gibalbal dinhi sa ato," ni Kulasa ngadtong Magna. "Aw, wa pa ron," ni Magna.

Migawas si Henyo ug misalga sa ilang gipanagsultihan ni Magna ug Kulasa. Kini si Henyo anak ni Magna.

"Dili na sila ungo, Nay, uy," ni Henyo pa.

"Hoy, Henyo, nahibawo baya mi nga uyab mong Conching," ni Magna ngadto sa anak nga ulitawo. "Ug si tatay nimo Pael dili gyud mosugot...nga padayunon mo ang imong pagpakigrelasyon anang Conching."

"Dili si Conching ang akong uyab Nay uy. Si Lolita ang akong uyab," kalma nga mipahibawo si Henyo.

"Unsa, kanang buta niyang manghod, uy, naunsa ka, Henyo? Buta, unya imong uyab, unya ungo pa gyud...sus, Ginoo," naglagot si Magna. Tuod, pagkasunod gabii, dihay nagwakwak sa tungod sa balay nilang Magna. "Wakkk! Wakkk!" lanog ang tingog sa wakwak. Ug gitawag si Henyo," Henyo, natulog ka na, ayaw una, kay pakuyogon tika."

Midalig bangon si Henyo, "Nay, si Lolita ron. Naa siya sa atong atop...akong kanaugon didto sa silong kay motugpa ra kana siya."

Unya nakita ni Magna nga gidala ni Lolita si Henyo sa iyang paglupad. "Nayyy, ayaw lang kabalaka, kay mobalik ra kooo!"

Ug nangurog si Magna sa kalagot kay ang iyang anak gidala sa buta nga wakwak nga si Lolita. (Kataposan)