Gilbert Tajanlangit Bayot

Way maayong buot si Christian. Kanunay siyang magmasulob-on gikan sa trabaho. Mingaw pa sa sementeryo ang ilang balay. Pito ka tuig na silang nagpuyo ni Eve apan wa gayod sila tugahi og anak wa gayod momabdos si Eve. Daghan nang mga doktor ug manghihilot nga ilang giduol apan way alibyo.

Kanunay silang manimba sa Opon, simbahan sa Birhen sa Regla aron pangayuon nga unta makabaton sila'g anak. Nagpasinog pa sila apan wa gayu'y nitisok sa iyang sabakan.

Tungod niini dili na molingi si Christian sa simbahan, ang iya na lang asawa ang mag-inusarang mosimba sa Opon.

Sa nahiuli na si Eve sa ilang balay, mingaw ang palibot kay wala pa mahiuli ang iyang bana. Usa ka supervisor si Eve sa MEPZA nga anaa mahimutang sa isla sa Mactan. Natingala si Christian nga sanag kaayo ang panagway ni Eve.

"Ngano ka oi! Ebyang nagsige ka mag pahiyom mura kama'g gihagwa sa imong Anghel!" ni Christian nga nangagho. "Naa man guy babaye nga ni butho dinhi kaganina. Nindot kaayo siyang ka estorya, Chan?"

Nilakaw si Christian, ug nisulod sa ilang lawak. Misunod kaniya si Eve.

'Abi mo, Chan gaan kaayo akong buot niya unya kalit lang gihiram akong tiyan dayong lakaw," ni Eve. "Nayabag kana nisugot ka nga wa ka kaila niya?" singka ni Christian ngadto kang Eve.

Sunod semana pista na sa Opon," manimba ta ha Chan?"

"Simba la’g imo," dayong lakaw ni Christian.

Gisabot lang ni Eve ang iyang bana.

Sayong nibangon si Eve aron mosimba siya sa kapistahan ni Birhen sa Regla. Si Christian nagpabilin sa banig, way kihol.

Wa'y kalibutan si Eve nga gisundan siya sa simbahan ni Christian. Samtang nagmisa, kalit nahagba ug nakuyapan si Eve.

Daling gisakwat ni Christian si Eve aron dad-on sa kumbento. Sa naulian na si Eve, nidiretso sila sa ilang doctor paghuman sa misa.  Didto, "Congratulations ninyong duha, usa na ka bulan nga nagsabak ang imong asawa?" ni Doctor Emz Santiago pa.

Labihan ang ilang kalipay.  Ug naka- hinumdom si Eve sa babaye nga nihikap sa iyang tiyan kaamgid  og nawong sa  Birhen sa Regla. (Kataposan)