Duha ka dagsa

Sulod na sa 26 ka tuig ang pagpuyo ni Ruben sa usa ka isla. Siya ray nagpuyo sa isla nga wa gani masayod kun unsay ngalan sa maong isla. Apan tungod sa kabalaknon sa maong isla, iya kining ginganlan og isla Romantika.

Sulod sa gidugayon sa  iyang pagpuyo sa maong isla nalingaw na lang siyang nakig-uban sa mga mananap ug sa nagkalain-laing matang sa mga langgam nga sa sayong kabuntagon ug sa dayon nang saliid sa adlaw sa tambilagaw sa kasadpan, mopabati sa mananoy nilang mga awit.

Usahay motukbil sa iyang hunahuna ang kamingaw sa iyang gigikanan ug kang Mitzi. Si Mitzi, ang iyang hinigugma nga nagtrabaho sa usa ka banko. Unsa na kaha ang iyang kahimtang? Tingali minyo na kini. Naugkat ang usa ka halawom nga panghupaw gikan sa kahiladman ni Ruben. Nahinumdom siya nganong nahidagsa siya sa isla.

Usa ka gabiing madulom, samtang naglawig ang barko nga gisakyan ni Ruben paingon sa Manila, taliwala sa kalantap sa dagat, wala damha nga makasugat kini og bagyo. Kusog kaayo ang bagyo nga maoy nakapalunod sa barko. Nagkatibulaag ang mga pasahero. Nagpaninggit og pakitabang taliwala sa nagpaminting kinaiyahan.  Apan si Ruben wala kawad-i sa panimaan ug panimuot hangtod nga gidagsa siya sa isla, isla nga nagtungok, mura'g puting elepante nga naglubog taliwala sa dakong lawod.

Unya usa ka adlaw niana, may tawo nga nag-utaw-utaw dili layo sa baybayon. Nagkaduol ang tawo nga nadala sa taubon. Giduol ni Ruben ang tawo ug gisapwang paingon sa lapyahan. Duna pa kini kinabuhi, nagkanayon ang kaugalingon ni Ruben. Iyang gipakaon sa bungang kahoy nga maoy iyang gikabuhian sa isla. Pipila ka gutlo naulian sa maayong panimuot ang tawo.

"Kinsa ka? Unsay nahitabo kanimo?" sukot ni Ruben.

Wala'y tubag nga nabati si Ruben. Gipangutana niya pag-usab ang tawo. Apan mao gihapon wala kini motubag. Sa hunahuna ni Ruben na amnesya ang tawo. Wala  na kini nahinumdoman kun kinsa siya ug diin siya gikan.

"A, nganlan tika'g Friday kay gidagsa ka man dinhi sa isla Romantika sa adlaw'ng Biyernes," matud ni Ruben. "Sugot ka?"

Mingisi ang tawo ug miyango-yango.

Nalipay si Ruben kay duna na siya'y ikauban pagpuyo dinhi sa isla. (Kataposan)