Tinamdan sa tawo

Matag sayo sa buntag, moadto gyud ko sa akong suki nga bakery aron sa pagpalit sa paborito namo nga pan aron ipares sa kape.

Ug sa matag higayon nga atua ko didto, akong makita kining tigulang nga babaye nga maghigda diha sa gawas sa bakery.

Bation ko og kalooy kaniya kay nagmantinel lang intawon siya og karton nga iyang ihapin sa semento. Sagad tunulan ko siya og pan kun maatol nga nagmata na sa akong pag-abot.

Usa kahigayon niana, nakigsulti ko sa tigulang. Gipangutana ko siya sa iyang ngalan. Akong nahibaw-an nga siya si Agripina Laviste ug taga siyudad gyud kuno siya.

“Ngano nga niabot man ka dinhi sa among baryo?” gisukna ko ang tiguwang. Gipasabot ko niya nga nakagusto siya sa among lugar.

Sunod nako nga pangutana kun may pamilya ba ang maong tiguwang.

“Wa ko’y pamilya kay wala man ko maminyo, pero duna ko’y igsuon nga lalaki ug mga pag-umangkon sa una, nagtipon mi’g puyo sa balay sa among mga ginikanan, apan kadugayan gipalayas ko nila kay hasol kuno ko,” saysay ni Iya Agripina.

Gibati ko’g kaluoy ni Iya Agripina kay tiaw ba nimo may kadugo apan gipasagdan lang.

Usa ka buntag niana, nahibulong ko kay wala ko makita si Iya Agripina sa bakery. Nangutana ko sa mga tindera. Naligsan diay ang tiguwang sa usa ka delivery truck nga gipanag-iya sa kompaniya.

Namatay gyud si Iya Agripina ug ang iyang kamatayon napatik gani sa Banat News.

Diha nga nasayran ni sa mga pag-umangkon ni Iya Agripina, usa ka doctor, may magtutudlo ug usa ka enhinyero, naglumba sila og paila sa opisina sa kompaniya nga sila ang mga pag-umangkon sa namatay aron madawat ang dako’ng kantidad.

Pagkasayod ko niini, ako nakapamalandong nga kining tawo diay, bisan og kadugo mo basta wa sila’y makuha nimo, ila ka nga isalikway.

Apan kun duna gani sila’y makuha kanimo, mag-ilog sila. Ingon niini ang nahitabo ni Iya Agripina. (Kataposan)