Night market

Ingon sa nakalitan si Cesar sa iyang nasaksihan nga gitulis ang tawo nga bag-o pa nga migawas sa bangko. Nagtuo si Cesar nga nagkobra og kuwarta ang maong tawo nga gitulis niining mga armado nga nagsakay og motor.

Gitionan og armas sa tulisan ang tawo nga ilang gitulis ug midumili paghatag sa gibitbit niini nga clutch bag. Taud-taud, milanog ang buto ug nakita ni Cesar nga nabuhian sa tawo ang clutch bag ug nakuha g’yud sa tulisan.

Nagdagan ang tulisan paingon sa motorsiklo nga nagpaabot sa unahan ug diyutay. Wala masayod si Cesar kun unsay iyang pagabuhaton. Apan nakasigpat siya og kahoy duol sa iyang nahimutangan.

Abtik kini nga gipunit ni Cesar ug gidagan ang tulisan nga mao pa g’yud ang pag-angkas sa motorsiklo aron moikyas. Gihurot ni Cesar ang iyang kusog ug gibunal ang kahoy ngadto sa ulo sa tulisan!

Diha-diha nga nahagba ang tulisan gikan sa motorsiklo ug nasarasay ang motorsiklo daplin sa karsada. Midagan si Cesar paingon sa kauban sa tulisan nga maoy nagmaneho sa motor nga nalukapa sa karsada.

Gibunalan niya pag-apil ang tawo ug naigo ang iyang mga bukton sa tanto niining pagpanagang. Wala madugay, dunay mga patrol car sa kapolisan nga miabot.

Miundang na si Cesar sa pagbunal sa mga tulisan kay nakita niya nga gipangposasan dayon sa mga polis ang duha ka tulisan, apil kadtong tulisan nga naghapa pa sa karsada.

Gidali pagdala sa ospital ang tawo nga gipusil sa tulisan. Giapil usab pagdala sa tambalanan ang duha ka tulisan nga naangol pagbunal ni Cesar. (Sumpayan)