Kaalam sa abogado

Atorni, di ka lainan? Nga sukad namatay ang atong amo nga tiguwang, ang napuli nga anak istrikto man kaayo? Puwerte man nga kutiha? Kami maoy malooy magtan-aw nimo nga sa usa lang ka dokumento ipahimo, hasta kalima o kaunom man ipausab niya,” ni Manny, nga clerk/messenger sa usa ka kompaniya.

Nakighinabi si Manny kang Atty. Conrad Umapas atol sa lunch break nga wala sa ilang opisina ang bag-ong CEO nga si Mr. Steve Tan, puli sa namatay nga si Mr. Onofre Tan nga maayo kaayo’g gawi sa iyang mga sakop.

Di man kalikayan nga makadungog sila’s mga reklamo ni Mr. Steve ngadto sa abogado nga sa ilang paminaw, gitratar na lang nga usa ka ordinaryo nga typist. Sayesintahon na si Conrad, wa’y sekretarya ug siya’y mangunay og dukdok sa computer kun adunay ipabuhat nga dokumento ang ilang amo.

Subra 20 ka tuig na nga in house counsel si Conrad sa among establisimento. Sulod sa dako nga opisina ni Mr. Steve, lima sila nga nag-uban sa mao ra nga lawak.

Ang lamesa ni Mr. Steve anaa sa sentro nga bahin sa habig sa amihan. Ang mga lamesa ni Conrad ug Manny anaa sa silangang habig.

Ang mga lamesa ni Jean (secretary ni Mr. Steve) ug Yenyen, bookkeeper, anaa usab sa kasadpang habig sa lawak.

Mungislo sila sa kada saway ug koreher ni Mr. Steve sa mga dokumento nga gihimo sa abogado.

“Wa g’yud nay problema nako, Man” ni Conrad nga nagpahiyom. “Ngano man, atorni?” ni Manny.

“I love my job. I love my boss. Dili ko happy kun dili nako ma-satisfy ang akong boss,” ni Conrad. “Grabe gud nimo, atorni?” ni Manny nga halos dili katuo sa baruganan sa abogado.

“Akong boss o kliyente ako nga giisip nga customer. Ako, supplier of service. Ang akong goal is to satisfy my customer. If he is not satisfied, I’m also not satisfied. Kay alang nako, customer is always right,” ni Conrad.

Nanindog sila’s Jean, Yenyen ug Manny. Namakpak. Nipakpak lang sab si Conrad. “Mao gyud na angay ninyong attitude. Otherwise, you will turn out hating your boss and your job. You have to change or adjust your outlook to adapt to the situation,” ni Conrad.

Hilom nga nagkatinan-away sila si Jean, Yenyen ug Manny apan makahuloganon ang ilang mga tinan-awan sa usa’g-usa.

Kay hilom sila nga nasilag sa ilang bag-ong amo. Na-guilty sila kay nalamdagan ang ilang kaisipan sa kaalam sa abogado. (Kataposan)