Husto gyud nga magpakisayod

Dear Tita Salie,

Have a nice day. Tagoa lang ko sa ngalan nga Pierre. Sa imong hunahuna, ngano nga kasagaran maayo man ang pagpangutana? Pasabta ko. Daghang salamat sa pagtagad.

* * *

Dear Pierre,

Kasagaran maayo ang pagpangutana aron mahatagan og husto nga tubag ang kalibog sa atong panghuna-huna.

Ang laing rason usab ngano nga maayo ang pagpangutana aron matagbaw ang atong pagkamausisahon.

Bisan ang mga bata adunay mga simple nga pangutana ngadto sa ilang mga ginikanan nga nagkinahanglan usab og mga tubag.

Kun kita naglakaw diha sa daghan nga sanga nga mga dalan, mangutana kita aron masayod kita kun asa niini ang husto nga dalan nga atong pagasubayon ug pagalaktan aron makaadto kita sa destinasyon nga atong adtoan.

Aron usab nga atong malikayan ang mga peligro nga sagad atong masugatan, ilabi na gayud kun dili nato sinati ang maong dapit.-- Tita Salie