Pangalagkalag

Nalingaw si Bobby sa pagkuyogkuyog ni Eddie sa pagpangalagkalag sa baryo Kabadyangan. Managkauban man gud sila si Eddie ug Bobby sa trabaho sa call center sa siyudad.

Busa, diha nga giimbitar si Bobby ni Eddie nga mangalagkalag sila sa ilang baryo, misanong dayon si Bobby sa pagdapit sa suod niya nga higala.

Ang mga molupyo sa Kabadyangan, pulos gayud diay maghikay og lamiang pagkaon panahon sa kalagkalag.

“Nabuhong na ko sa mga lamiang pagkaon sa atong pagpangalagkalag sa kabalayan ning gabhiona bay Ed! Hapit na nato mahurot og pagpangalagkalag ang kabalayan sa inyong mga silingan.”

“Naa pay usa ka balay nga atong pangalagkalagan ning gabhiona, bay Bob...!” ug gitudlo ni Eddie ang usa ka dako ug karaang balay sa unahan. “Tana, Bob...!”

Wa’y pagsupak si Bobby nga misunod gihapon kang Eddie paingon sa dako ug karaan nga balay. Human mangayo og katahuran, gipasaka dayon sila si Bobby ug Eddie sa tagbalay.

“First time mi nga nangalagkalag sa inyong balay, Noy Nerio ug Nang Lita..!” matud ni Eddie ngadto sa magtiayong edaran nga tag-iya sa dako ug karaang balay.

“Maayo ‘sab nga may kauban ka, Eddie! Unang higayon g’yud nga nangalagkalag ka ning among balay kay tua naman ka sa siyudad manarbaho!” nagpahiyom si Noy Nerio.

“Sige, adto mo sa talad kan-anan Eddie uban sa imong kauban kay naay daghang sud-an...!” mitimang si Nang Lita ug mitudlo sa kusina.

Nagkalingilingi si Bobby sa sulod sa balay, dihang mipadulong na sila si Eddie sa talad kan-anan sa kusina.

“Mora’g haunted house man ning balaya, bay Ed! Wa’y mga anak ug paryente kining edarang magtiayon...?”

“Pulos na nangaminyo ang upat ka anak nilang Noy Nerio ug Nang Lita ug tua na sa Amerika manimuyo! Sila na lang duha ang nanimuyo ning karaang balay, bay Bob...!”

Nahasiga ang mga mata nila ni Bobby ug Eddie sa kadaghang linutong sud-an nga gisulod sa mga dagko’ng bandehado. Pagkadagko sa hiwa sa karne nga sud-an! “Di man ‘sab ni karne sa baboy, baka, kabaw, ang ilang mga adubo, bay Ed! Hala, dunggan sa tawo man kana’ng adubo nila sa sulod sa usa ka bandehado, Bay Ed!”

“Shh! Ayaw’g saba, Bay Bob! Wa lang tika masultihi! Balay sa ungo kining atong gipangalagkalagan karon...!”

Tulin pa sa manatad nga nananghid sa pagpamauli sila si Bobby ug Eddie nilang Noy Nerio ug Nang Lita niadtong gabhiona. (Katapusan)