Night market

Gula 13

Paspas kaayo ang pagkilab sa mga gutlo ug gisaw-an nila ni Cesar ug Alma ang makabuhong nga kalipay sulod sa air-conditioned room sa motel. Karon natugkad na g’yud ni Cesar nga matuod siya nga gimahal ni Alma kay bisan og usa siya ka Kristiyano, apan ang dalaga nga usa ka Muslim mitugyan kaniya sa iyang pagka babaye.

Nag-abot ang gininhawa nila ni Cesar ug Alma ug anam-anam nga ang ulitawo nahagba sa kiliran sa dalaga, apan padayon siya niini nga naggakus.

Mibathay ang pahiyom sa mga ngabil ni Alma nga milingi kang Cesar. “Karon, sigurado ka na g’yud nga in-love ko nimo kay gitugyan man nako kanimo ang akong pagka ako,” matud ni Alma.

“Yes, ug laomi nga bugtian usab nako og lunsay nga paghigugma ang imong pagsalig kanako. Dili kita magbuwag ug andam ako nga mag-antos kun gikinahanglan,” ni Cesar.

Napagakus si Alma kang Cesar tungod sa naghingapin nga kalipay human niya mabati ang mga pasalig sa ulitawo. Apan unya, mibuhi kini og usa ka lawom nga pagpanghupaw.

“Sigurado g’yud ko nga dako’ng problema ang magpaabot kanato sa unahan kun mahibaw-an sa akong mga ginikanan nga nakigrelasyon ko og dili sama kanamo nga Muslim,” matud ni Alma.

Wala dayon motubag si Cesar, mura’g adunay lawom nga gihuna-huna. “Ang maayo tingali nga mobiya ka sa inyong panimalay ug adto na kita mamuyo sa Leyte. Dili na kita matultolan didto,” sugyot ni Cesar.

“Panid-an usa nato ang sitwasyon, basta kay nasayod g’yud ko nga kasilagan ako niini sa akong mga ginikanan,” matud ni Alma. (Sumpayan)