Tawo-tawo sa humayan

Ning buntaga, nalukop na ni Mark sa pagsuroy ang 10 ka ektaryang humayan, nga sa sunod semana, angay na g’yud nga anihon.

Dasok ug himsog ang lugas sa mga bunga sa humay nga gisapnay sa matag uhay niini. Ug sa matag ektarya sa kahumayan, nagbarug ang tulo ka tawo-tawo sa humayan nga gituyo paghimo ug gipabarug ni Mark.

Ang tawo-tawo sa humayan sa matag ektarya, mura’g matuod nga guwardiya sa anihunong humay, aron dili hasion sa pagtuhak sa panon sa mga langgam nga maya. Milampos si Mark! Wa’y nangahas sa pag-ukit sa iyang kahumayan.

May payag si Mark nga ginama sa kawayan ug giatopan niya’g kugon. Kini ang tagboanan nila ni Glenda.

Si Glenda, nga usa ka nurse ug kamanghurang anak sa ilang barangay kapitan, mao ang uyab ni Mark. Apan may problema ang ilang relasyon ug kinahanglan sila nga magkalinay-anay!

Maoy gusto sa mga ginikanan ni Glenda nga adto na siya manarbaho sa Amerika ug nakatakda na ang iyang flight.

“Kuntento na lang unta kaayo ko isip usa ka nurse sa pribadong ospital sa siyudad, Mark! Apan mapugsanon si papa...!” mao kini ang gisulti ni Glenda kang Mark sa daklit nila nga panagbagat sa payag kagahapon sa buntag.

Ug sulod sa payag kagahapon, wa makabalibad si Mark kang Glenda, dihang pugos niining gitugyan ang iyang kaputli sa ulitawo. Timaan kini sa matuod nga gugma ni Glenda sa ulitawo, bahala na kun sila magkalinay-anay.

Karon, nakapanglingo si Mark. Gidoble niya ang iyang kakugi sa pagpangunay og tikad sa 10 ka ektaryang basakan sa humay. Gigamit niya ang naantigohang kaalam sa panguma sa paggradwar niya sa kursong Agrikultura.

Naghago siya sa paghimo og mga tawo-tawo sa humayan aron dili hasion sa siaw’ng mga langgam ang bunga sa iyang kahumayan.

Ang abunda unta niyang ani, iyang gitagana aron mangasawa kang Glenda.

Gipahibalo na usab unta ni Mark ang iyang Papa ug Mama alang sa taliabot nilang kaminyuon ni Glenda human sa ting-ani. Apan nakalarga na si Glenda kagabii sa Amerika! Wa’y kadasig nga misulod si Mark sa payag. Apan kalit nahasiga ang mga mata ni Mark sa iyang nakita. Didto sa sulod si Glenda! Ug hugot silang nagginaksanay.

“Abi ko’g nakalarga na ka gabii, Glen...!”

“Gitug-anan ko sila si papa ug mama nga may nahitabo na nato...!”

Lahos sa bentana sa payag, nalantawan nila ni Mark ug Glenda sa tungatunga sa humayan ang tawo-tawo nga nagkiaykiay, gihuros sa siaw nga huyuhoy, samtang padayon sila nga nagginaksanay. (Kataposan)