Night market

Gula 11

Samtang padayong nag-agbay kang Alma, may gihunghong si Cesar ngadto sa iyang girlfriend.

“Ha? Hala dili ko uy, mahadlok ko,” matud ni Alma apan sa paraygon kaayo nga tingog. Ingon sa nagpakiluoy si Cesar nga tumanan siya sa iyang gihangyo. “Sige na gud, ayaw ko’g balibari.”

Hangtud nga wala na motingog pa si Alma. Mitindog si Cesar ug hinay niya nga gigunitan ang kamot sa dalaga. Mitindog ‘sab si Alma ug mainampingon sila nga nanggawas gikan sa sinehan.

“Asa man diay ta?” gisukna sa dalaga ang iyang boyfriend. “Adto ta og lugar nga dili kita magpugong-pugong sa atong mga pagbati. Kanang tudo bigay g’yud,” matud ni Cesar nga nag-agbay kang Alma.

Nakasabot si Cesar nga nasabtan ni Alma kun unsa ang dapit nga gusto niya nga ilang adtoan gikan sa sinehan. Taud-taod, hugot ang paggunit ni Alma sa bukton ni Cesar. “Gikuyawan baya ko Sar.”

“Ayaw gud kahadlok. Dili ba misaad man ako nimo nga andam ko nga magsakripisyo tungod og alang sa atong gugma?” giingnan ni Cesar ang Muslim niya nga girlfriend. Mipara sila’g taksi paggawas na nila sa SM Mall.

“Sa Q7 lang mi bai,” gimandaran ni Cesar ang drayber sa taxi nga abtik kaayo nga nakapadagan sa iyang sakyanan. Nagsugod na’g parayeg si Alma kang Cesar, gisandig niini ang iyang ulo sa dughan sa iyang boyfriend.

Wala makasabot si Cesar sa iyang gibati ilabi na diha nga nakita niya nga misulod na ang gisakyan nila nga taxi sa entrance sa motel. (Sumpayan)