Nagbasol, bata gipakuha

Dear Tita Salie,

Just call me Krista, single, 23 years old. Nakauyab ko’g usa ka minyo ug nabuntis ko niya. Akong gipakuha ang akong gisabak ug nakuha g’yud ang bata. Until now, akong gibasolan ang akong gibuhat. Wala ko’y maayo nga kinatulgan. Pasabta ko.

* * *

Dear Krista,

Sa sinugdan malipayon ka nga milampos ka sa pagbuhat sa usa ka dako’ng sala atubangan sa tawo, ilabi sa Diyos. Ug karon mao na kini ang imong naani. Apan dili pa ulahi, kun tinuod nimo kini nga gibasolan ug kun tinuod nga gibati nimo ang kasubo sa sala nga imong nahimo.

Ang Diyos misaad sumala sa Isaias 1:18 nga nag-ingon: “Bisan tuod ang inyong sala nagpula, kini papution ko sama og niyebe.” Nagpasabot kini nga ang Diyos may kahingawa kanimo. Ug sa imong bahin usab kinahanglan nga mohimo ka og mga paagi nga mahimuot ang Diyos aron mahupayan ang imong hunahuna.

Pagbutang og reyalistiko nga mga tumong alang sa imong kaugalingon. Pananglitan, magbasa ka sa pulong sa Diyos. Himoon nimo nga tumong ang pag-alagad kaniya. Ug mag-ampo ka kanunay niya. - Tita Salie