Ambisyosa - Gula 15

Paspas nga nanglabay ang katuigan, apan wala mamatay si Marit, sukwahi sa gisulti sa iyang amahan. Wala gayud mahitabo nga nagkaaway sila ug si Lito. Sa laktud, malipayon kaayo ang ilang panag-uban.

Hangtud nga miabot ang higayon nga gipatawag si Lito sa amahan ni Marit. “Gikan pa ko sa akong doktor Lito. Ang tinuod, ako maoy adunay sakit nga cancer ug gitagalan na ang kinabuhi. Wala nako tug-ani niini si Marit aron dili maguol. Dili tinuod nga may sakit nga cancer si Marit.”

Mura’g gisubhan sa kalipay si Lito pagkasayod nga dili diay tinuod nga tinagalan na ang kinabuhi sa iyang asawa. “Gisukod ko lang kun tinuod ka ba usab nga nahigugma sa akong anak mao nga giingnan ko ikaw nga aduna siya’y sakit,” pasabot ni Fermin.

Paglabay sa pipila ka adlaw, namatay ang amahan ni Marit. Si Lito na ang nagdumala sa ilang mga negosyo, ilabi na ang ilang kompaniya nga nag-ugmad og mga condominium projects.

Usa sa mga sinaligan ni Lito sa iyang negosyo mao si Mark. Kanunay kini nga tambagan ni Lito nga moundang na sa iyang pagka tsikboy. Gitug-anan ni Lito si Mark sa iyang kaagi.

“Duna ko’y girlfriend nga six years na mi, pero dili ko mangasawa niya. Dali ra kaayo pasugton ang mga tsiks uy kun patuohon nimo nga daku ka’g suweldo,” giingnan ni Mark ang iyang boss.

Igo lang nakapanglingo-lingo si Lito nga namati ni Mark. Usa ka Domingo, miadto  si Lito sa dako’ng mall sa North Reclamation Area kay duna siya'y paliton ug iyang gikakita ang kanhi niya hinigugma. (Sumpayan)