Makasinghag sa ina-ina

Dear Tita Salie,

Ako si Doodz, taga Iloilo. Ang akong problema Tita kay naminyo pag-usab ang akong Daddy, unya maglagot ko kay ako man nga gibati nga gipulihan sa akong father ang dapit para kang Mommy mao nga usahay makasinghag ko niya. Pasabta ko, Tita Salie, kun husto ba ang akong gihimo.

* * *

Dear Doodz,

Ang pagkailalom sa disiplina sa bag-ong ginikanan dili sayon ug kun hangyoon nga buhaton sa usa ka ina-ina ang usa ka butang, tingali buot mo nga mosinghag ngadto kaniya.

Apan hinumdomi ang prinsipyo nga gipahayag sa 1 Corinto 14:20 nga magmahamtong sa inyong panghunahuna. Ang pagdawat sa katungod sa imong ina-ina sa pagdisiplina kanimo maoy usa ka paagi sa pagpakita nga ikaw nahamtong na sa imong hunahuna. Kun siya nagabuhat sa mga buluhaton sa usa ka tinuod nga ginikanan, angay nimo kini nga pagatahuron.

-- Tita Salie