Dulom nga kagabhion

Gikulbaan si Agnes sa balita sa radyo nga may barko nga nalunod sa miaging gabii didto sa kadagatan duol sa usa ka isla nga sakop sa Surigao. Base sa balita, ang M/V Amihan maoy nalunod. Wala g’yud masayop si Agnes kay kini maoy gisakyan ni Claro nga iyang bana.

Sagol kakulba ug kahinam ang gibati ni Agnes karong buntaga kay kun patay na si Claro, wala na siya’y angay pa nga kagul-an.

Wala na ang tawo nga kanunay lang modagmal kaniya. Bana niya si Claro apan wala g’yud siya makatilaw bisa’g gamay na lang nga kalipay kay kanunay lang siya niini nga bun-ogon.  Ang dili g’yud niya hikalimtan mao kadtong nakuhaan siya sa una unta nilang anak ug halos mamatay siya niadto sa kaguol. Gani, karon, daghan na ang wala makaila kaniya tungod kay midaot siya pag-ayo.

“Agnes, Agnes,” sangpit ni Tiya niya Onsiang nga midali’g saka sa ilang balay. “”Sus, daghan ra ba kuno nga nangamatay.”

Tuod, giadto dayon ni Agnes ang mga survivor, apan wala niya makita ang iyang bana. Paglabay sa usa ka tuig wala na g’yud magtuo si Agnes nga buhi pa si Claro.

Anam-anam na nga mibalik ang kahimsog ug kanindot sa lawas ni Agnes. Wala damha nga naibog kaniya si Efren nga maskulado og lawas ug may pagka bohemyo pud sa mga babaye.

Kanunay kini nga mamisita kang Agnes mao nga iya kining gisugot. Usa ka mingaw ug dulom nga kagabhion, gikumbinsir ni Efren si Agnes nga adto sila sa kuwarto magparayganay.

Tuod, pagka alas diyes na sa gabii, gipawong ni Agnes ang suga sa sala ug ang iyang lawak lang ang nagsiga.

Diha nga may misaka ug mitulod sa pultahan, nagtuo siya nga kini mao na si Efren. Naghubo siya sa iyang sapot ug gipawong ang suga.

Mihigda dayon siya ug dayon may migakos ug mihawok kaniya taman sa ginhawa. Namatikdan ni Agnes nga ang gihimo kaniya mura’g estelo ni Claro.

Ang paghawok, ang paggakos ug paghapyod-hapyod sa mga importante’ng parte sa iyang lawas -- kang Claro g’yud. Gipasiga ni Agnes ang suga ug maoy mibantang sa iyang mga mata si Claro nga nagtingsi ug adunay dako’ng uwat sa nawong.

“He, he, he, wa’y makaangkon nimo uy, Agnes, ako ra g’yud. Si Efren, anaa sa silong akong gigapos.

Hmmm...mibalik ang imong katahom ron da, Agnes...” gipadayon ni Claro ang iyang gibuhat ug milugmaw ang mga luha ni Agnes. (Katapusan)