Ambisyosa

Gula 11

Nakurat si Lito pagkadungog sa gisulti kaniya sa amahan ni Marit nga si Fermin. Ang tinuod nakagusto usab si Lito kang Marit apan wala siya magdahom nga managsama diay sila og pagbati sa dalaga.

Wala siya motingog og igo lang mitutok sa amahan ni Marit. “Wala namo tug-ani si Marit nga gitagalan na lang og pipila ka tuig ang iyang kinabuhi. Aduna siya’y cancer,” matud sa amahan sa dalaga.

Nakaginhawa’g lawom si Lito pagkadungog sa mao nga kasayuran. Nakita niya nga nagpaingon sa ilang nahimutangan si Marit. “Anak, mahimo ba nga kami usa ang magsultihanay si Lito… tawgon ka nako kun mahuman na kami og sultihanay,” ni Fermin.

Mapahiyumon si Marit nga mitalikod. Wala siya masayod kun unsa’y gusto nga pakigsultihan ni daddy niya kang Lito. Apan nagduda siya nga kabahin kini sa gitug-an niya nga nakagusto siya kang Lito.

“Buotan kaayo kana si Marit ug gusto ko nga sa nahabiling mga adlaw sa pagpakabuhi niya dinhi sa kalibutan, magmalipayon siya. Kay ikaw man ang iyang nagustohan Lit, hangyuon ko ikaw nga lipaya siya,” matud ni Fermin. Mura’g natuk-an si Lito sa iyang nadungog. Wala gayud siya makasabot sa iyang gibati. Wala siya masayod kun unsa ang iyang itubag sa amahan ni Marit.

“May pangutana ko kanimo Lito. Nakagusto ka ba usab sa akong anak? Kun nakagusto ka kaniya, ako kamo nga ipakasal, apan kun wala ka makagusto, anugon lang kaayo ang iyang gugma kanimo,” ni Fermin. (Sumpayan)