May gitago ang kangitngit - Gula 99

Nakigpinusilay sa kapolisan ang mga sakop sa kulto’ng Bangkulisan. Nagkaunay ang ubang mga polis kay may mga polis man nga miabin sa hepe nga maoy pangulo sa kulto. Ingon sa gisangag sa mga buto sa bala ang kalasangan.

Nakahimo gayud si Nicko sa pagpaduol sa halaran ug gitangtangan niya sa gapos si Barbie. Naluwas gayud niya ang bata.

“Roy!” gisangpit ni Nicko si PO3 Canares. “Ikaw nay bahala nila ni Gelli ug Barbie. Pangitaon nako si Chief Inspector Raval.”

“Yes, Sir,” abtik nga mitubag si Roy.

Nagpadayon ang pinusilay. Matag karon ug unya, mosapaw sa mga buto-buto sa armas ang tig-ik sa kasakit ug agulo sa kamatayon. Daghan na sa mga sakop sa kulto ang nangamatay.

Si Nicko, inabagan sa mga kaubang polis, ingon sa iring kumagat nga nakigsangka sa mga Bangkulisan.

Hangtud nga nag-abot na gayud ang dalan nila ni Nicko ug Chief Inspector Raval. Padulong na unta nga mo-ikyas ang pangulo sa kulto apan nasakpan kini ni Nicko. Iya dayon kining giatangan. Niining tungora, medyo hayag na ang palibot kay hapit na man ang kabuntagon. (Taposan sunod gula)