Kinilo

Medyo gikulbaan og diyutay si Karen sa pagpanuktok niya sa pultahan sa mahalong lawak sa usa ka dako’ng hotel. Di pa g’yud kaayo siya anad sa pagbaligya sa iyang lawas.

Kay kun wala pa lang namatay ang iyang sugar daddy, dili unta siya maingon niini. Niabli ang pultahan. Ning sayo nga kagabhion nisugat sa iyang panan-aw ang mestisohong lalaki, desente og barog, ug sayesintahon na ang pangedaron. “Good afternoon, sir” ni Karen. Nikanga. “Dayon, miss” sa lalaki. Mapahiyumon. Nisulod si Karen ug iyang gilibot sa iyang panan-aw ang wanang sa dako’ng lawak.

Harianon ang maong lawak. Nanira sa pultahan ang lalaki.

Nilingkod si Karen sa lingkuranan nga may antik nga desinyo, dikit sa antik ‘sab og desinyo nga lamesa.

Gisabak niya ang iyang shoulder bag nga gisambilay ganiha. “Unsa’y imong ngalan miss?” sa lalaki. “Tawga lang ko’g, Karen, sir” niya pa.

“Ay lang pag-sir nako. Tawga lang ko’g Jessie” sa lalaki nga nitunol sa iyang tuo nga kamot. Gidawat ni Karen. Wa siya magdahom nga maayo og gawi ang customer. Nahanaw ang iyang kulba. “Nanihapon na ka?” ni Jessie. Nilingkod sa atbang ni Karen. “Wa pa,” niya pa. “Magpa-room service  lang ta ug magdungan ta’g kaon,” ni Jessie. Niyango si Karen. Gaagad lang siya’s customer.

“Ayaw lang kahibulong nga makig-estorya ko nimo. Dako ko’g respeto sa mga babaye nga sama nimo kay dili sayon kining inyong gisudlan,” ni Jessie. Niduko si Karen. Nipahiyom. “Kamo maoy nakaalagad sa talagsaong panginahanglan. Akong asawa manghod nako’g lima ka tuig. Di na pahikap nako. Kay kuno tiguwang na. Ang sex sama na sa pagkaon. Moundang na ba diay ka’g kaon kay tiguwang na?” ni Jessie.

Nilapad ang pahiyom ni Karen. Wa gihapon mitingog.

“Kay tiguwang na lagi ko, may panahon nga ma-impotent. Apan gusto gihapon ko nga mohikap og babaye. Kun magpasabot ta sa usa ka kaila nga naibog ta, ingnon man lang ta dirty old man. Mao nga mapugos na lang ta’g order og kinilo” ni Jessie.

“Shhh!” ni Karen. Gihikap niya ang mga ngabil ni Jessie sa iyang tuong tudlo. Gihukas ni Karen ang iyang sapot. Gihukasan ‘sab niya si Jessie.

Lawom na’ng gabii paggawas ni Karen sa lawak. Nahinanok na si Jessie. Nagbayloay sila og numero sa selpon. Aron sunod higayon, direktahay na sila’g kontak. Wa nay labot ang bugaw. Nasayran niya nga may dagko’ng negosyo si Jessie sa Mindanao. Nianhi siya’s Sugbo kay may gitambongang konperensiya sa mga negosyante. (Kataposan)