Ambisyosa

Gula 9

Nakapangagho si Lito nga nakadungog. Nasayod na siya sa rason ngano nga gihulipan siya ni Grace niadtong tawo nga de kotse kay usa diay kini ka kuwartahan.

Dunay kotse si Lito apan kun may makagusto, iya man usab kini nga ibaligya tungod kay mao man kini ang iyang business gawas sa pagtrabaho isip car painter.

Ang gitug-an sa tindera nga kauban ni Grace nga usa siya ka tawo nga walay nahut kon walay kuwarta ug maoy rason nga siya gitalikdan gusto nga himuon ni Lito nga gabayan sa kalampusan.

Nanglabay ang mga buwan sa mapait nga kasinatian ni Lito. Gilingaw niya ang iyang kaugalingon hangtud nga milambo ang iyang buy and sell business sa mga sakyanan.

Hangtud nga gikaila ni Lito si Marit, anak og dakong adunahan sa dakbayan sa Sugbo. Nakagusto kaayo si Marit kang Lito tungod sa iyang kabuotan.

Nagkanunayan na si Marit sa shop nga gitrabahoan ni Lito. Hangtud nga gitanyagan ni Marit si Lito nga adto motrabaho sa ilang kompaniya.

Usa ka hapon, adunay hamtong lalaki nga miadto sa shop nga gitrabahoan ni Lito. Mahinangpon kini nga giabi-abi ni Lito bahin sa iyang tuyo nga nangutana og presyo sa pagpapintal og sakyanan.

Human nila og estorya ni Lito ug sa hamtong lalaki, mipahiyom ang lalaki ug nagpasalamat. “Salamat kaayo Lito, tinuod g’yud diay nga buotan ka,” matud sa tawo.

 Nahibulong kaayo si Lito nga nakaila niya ang hamtong lalaki. Dayon kalit miabli ang pultahan sa likud nga bahin sa awto ug migawas si Marit. (Sumpayan)