May gitago ang kangitngit - Gula 97
“Gikasubo ko, SPO1 Bernal. Apan nalatid sa among kasugoan nga kinahanglang mapatay ang tanang batang babaye nga natawo sa Septiyembre 8 aron pagseguro nga wala na’y Maria nga manginahan pag-usab ni Jesus kinsa gikatakdang magpakatawo pag-usab dinhi sa kalibotan.
“Busa sa dili pa nako patikan og sungay ang mga kumagko sa bag-ong mga sakop sa Bangkulis, patyon namo ang imong anak,” giingnan ni Chief Inspector Dindo Raval si SPO1 Nicko Bernal.
“Unsa may atong buhaton karon Nicko?” ni Gelli nga mabalak-on. “Mag-ampo kita sa Dios, Gelli. Nasayod ko nga dili kita niya pasagdan,” matud ni Nicko.
Kaadlawon na. Nakita ni Nicko nga gidagkotan na sa mga sakop sa kulto ang daghang kandila sa palibot sa halaran. Gikulbaan si Nicko.
Nakita niya nga mibarog ang hepe atubangan sa halaran ug miisa sa iyang mga kamot. May seremonyas nga gipahigayon ang mga Bangkulisan.
Mikuha ang pangulo sa kulto og usa ka punyal ug miduol sa nahimutangan ni Barbie nga gigapos ug gipahigda ibabaw sa halaran.
Misinggit ang hepe. “Ihalad ngadto sa atong dios ang dugo niining bataa!” Dayon, gihugtan paggunit sa hepe ang punyal unya mihuyad aron pagtampok sa dughan sa bata.
“Ayawww...!” milanog ang singgit ni Nicko. Ang iyang tingog naglanoglanog sa mamingaw nga lasang. (Sumpayan)
- Latest
