Dili pa ready

Dear Tita Salie,

Tagoa lang ko sa name nga Dacey. Mabdos ko karon mag 3 months na ang akong tiyan. Ipakuha unta nako ang akong gisabak kay dili pa ko ready nga mahimo’ng inahan kay 15 years old pa ko. Ang amahan 20 years old na. Supak siya sa akong plano kay andam kuno siya manubag. Please advice me.

* * *

Dear Dacey,

Ayaw pasagdi nga nakadapa ka human ka madagma. Imbes mobangon ka, ayaw tuyoa nga mosawom ka sa tubig nga lubog aron lang mahugasan ang buling nga imong natagamtaman. Ayaw likayi ang problema nga imong giatubang, hinuon sulbara kini ug ayaw padaog sa imong emosyon. Hibaloi nga ang matag binhi nga anaa sa sabakan sa inahan bililhon kana sa Diyos. Ayaw isalikway ang ganti sa Diyos nimo. Pakigsulti sa imong mga ginikanan kay sila maoy dangpanan sa panahon sa kasakit. Kun imo kini nga pasagdan sama ka og nagtan-aw og TV nga daot kaayo ang singal. Ayaw kalimot sa pag-ampo kun naglibog pa ang imong hunahuna. Nahibalo ang Diyos nga naguol ka, ug siya nakasabot sa imong kagul-anan ug siya makahupay sa imong nagpuot nga dughan.

-- Tita Salie