May gitago ang kangitngit

Gula 96

Si Chief Inspector Dindo Raval miduol kanila ni SPO1 Nicko Bernal ug asawa nga si Gelli. Nagsul-ob na kini og taas nga sinena nga sama sa gisul-ob sa ubang sakop sa kulto.

“Kumosta ka na, Nicko?” matud sa hepe nga maoy pangulo sa kulto’ng Bangkulisan. “Demonyo ka’ng dako, hepe!” nagpaminti sa kasuko si Nicko.

“Husto ka. Ug hapit na mohari ang gahom sa demonyo. Mopatigbabaw na dinhi sa kalibotan ang gahom sa kangitngit ug kadaotan,” ni hepe.

“Ang gahom ug bahandi ang akong tumong pagsulod sa Bangkulis. Nagplano ang kadagkoan sa Bangkulis sa tibuok kalibotan sa pag-ilog sa kagamhanan sa tanang kanasuran. Magbutang sila’g mga opisyal sa tag-as nga mga buhatan sa gobiyerno. Ako ang kandidato sa Bangkulis pagka mayor dinhi sa Tinago sa sunod nga eleksiyon.

Kun ang mga Bangkulisan na ang magkupot sa renda sa kagamhanan, sayon na lang unya ang pagpalusot sa illegal activities. Ang illegal activities maoy maghatag og kaharuhay sa katawhan sa atong nasud. Mao kini ang sulbad sa suliran sa ekonomiya, dili ang pagpatuman sa kasamtangang mga balaud karon sa Pilipinas,” mipasabot si Chief Inspector Raval.

“Ayaw pasipad-i ang akong anak, hepe, maluoy ka sa bata,” matud ni Nicko. (Sumpayan)