May gitago ang kangitngit

Gimandoan ni SPO1 Nicko Bernal ang iyang mga kaubang polis nga padayonon ang pagpangita sa mga sakop sa kulto nga midagit sa iyang asawa ug anak.

“Nagtuo ko nga dili nila hilabtan sila si Gelli ug Barbie ilabi na karon nga nadakpan na nako ang ilang pangulo. Naghulat lang sila sa mando sa hepe kun kanus-a ipapatay ang akong anak. Apan karon, wala na’y makamando kanila,” ni Nicko.

Si Nicko nagpabilin sa police station. Iyang gibantayan ang hepe aron pagseguro nga dili gayud kini makaikyas.

Gibantayan usab niya ang matag tawag nga modangat sa telepono sa opisina sa hepe ingon man sa relo nga Rado.

Pagkagabii, diha ra natulog si Nicko sa iyang opisina. May mga polis usab nga nahibilin sa police station.

Pasado alas dose sa tungang gabii, nakamata si Nicko. Napugwat siya diha nga may nabati siya nga buto-buto sa gawas.

Midali siya paggawas apan napahunong siya. Maoy mitagbo sa iyang panan-aw ang mga polis nga nangligdas sa yuta.

Diha na sa gawas sa bilanggoan si Chief Inspector Dindo Raval uban ang mga polis nga mition sa ilang mga armas ngadto kang Nicko.

Wala makalihok si Nicko. Gilibotan siya sa maong mga polis. (Sumpayan)