Ambisyosa

Gula 3

Wala g’yud makasabot si Lito ngano nga dili man motubag si Grace bisan kapila na siya mokontak.

Pag-off ni Lito sa trabaho nianang pagkahapon, giadto niya si Grace sa gitrabahoan niini. “Giimbitar ko’g party sa akong amiga gabii ug wala na ko maka-text nimo kay nahutdan ko og load,” matud ni Grace.

Apan makapila ko kahigayon nga mikuntak nimo kaganinang buntag, wala ka ‘sab motubag. “Nagdali ko pag-andam kay dugay ko nga nakamata mao nga wala na lang ko motubag,” dugang pasabot ni Grace.

Nakamatikod si Lito nga mura’g bugnaw ang tinagdan sa iyang girlfriend kaniya. “Huwaton tika karon inig-out ninyo kay magkuyog ta,” giingnan ni Lito si Grace.

“Ayaw na lang ko paghuwata kay mura’g mag-overtime mi. Usbon kuno ang set-up sa mga display ug apil ko nga mo-duty. Maninguha ko aron makapadala og kuwarta nila ni Papa ug Mama,” matud ni Grace.

Mipauli si Lito nga kuwang og kadasig. Nakabantay siya sa kausaban sa tinagdan ni Grace kaniya. Iyang gihinuktokan kun unsa kaha ang hinungdan.

Tuod, nakahinumdom si Lito nga gibalibaran niya si Grace diha nga mohuwam unta og P50 mil kaniya aron kuno ipadala sa mga ginikanan niya sa probinsya ug iyang gibalibaran.

Dugay nga nakatulog si Lito. Hangtud nga gibati siya’g kagutom. Migawas si Lito ug gisakyan ang awto nga iyang igbabaligya. Rumbo niya ang downtown area ug maagian niya ang gitrabahoan ni Grace.

Napasiga ang mga mata ni Lito kay wala gayud siya masayop nga si Grace ang babaye nga misakay sa usa ka kotse nga nagparada atubangan sa department store. (Sumpayan)