Ambisyosa

Gula 2

Sanglit buy & sell ang negosyo ni Lito, may mga higayon g’yud nga maapeki siya sa kuwarta ug usahay ‘sab abunda kun mahalinan og maarang-arang nga presyo.

Miabot gayud ang higayon nga naangkon ni Lito ang pagkababaye ni Grace. Loving na kaayo si Grace ngadto kang Lito.  Nakahukom na si Lito nga si Grace maoy babaye nga dad-on niya sa altar sa kaminyuon.

Diha’y higayon nga gusto’ng mogamit og kuwarta si Grace kang Lito kay ipadala kuno sa dalaga sa iyang mga ginikanan sa probinsya. Sanglit daku man ang kantidad nga gidemanda ni Grace, gibalibaran kini ni Lito.

Nahibulong si Lito diha nga usa ka gabii nga gikuha niya si Grace sa iyang gitrabahoan nga tindahan, iyang nahibaw-an nga wala diay kini mi-duty sa maong adlaw.

Ingon sa dili makatuo si Lito tungod kay nag-text pa sila sa udto ug giingnan siya ni Grace nga anaa siya sa canteen sa tindahan nag lunch uban sa iyang mga kaubang tindera.

Gisuwayan pagkontak ni Lito ang cellphone ni Grace. Dili makontak, mura’g gi-off.

Giadto ni Lito sa gipuy-an ni Grace sa V. Rama Avenue apan wala usab kini didto.

Nabalaka si Lito kun hain na ang iyang girlfriend. Mipauli na lang si Lito sa iyang gipuy-an. Bisan og giunsa niya pagkontak, wala gayud niya makontak si Grace ug hangtud nga nakatulog na lang siya.

Pagkabuntag, gitan-aw dayon ni Lito ang iyang cellphone kay basin og nag-text kaniya si Grace, apan wala g’yud. Gikontak niya si Grace. Tuod, mi-ring na ang phone apan walay mitubag. (Sumpayan)